ठाणे - गुटखा विक्रीस बंदी असूनही राजरोसपणे गुटखा विक्री जिल्ह्यातील बहुंताश शहरात सुरू असल्याचे दिसून येत आहे. हाच गुटखा खाणे एका तरुणाच्या जीवावर बेतल्याची घटना समोर आली आहे.
ही घटना भिवंडी-कल्याण रोडवरील अत्तरवाला कॉम्प्लेक्स या इमारतीच्या पहिल्या मजल्यावर घडली आहे. सकाळच्या सुमाराला पहिल्या मजल्याच्या ओपन गॅलरीत गुटखा खाऊन थुंकताना तोल गेल्याने तरुण खाली पडला. या अपघातात त्याचा जागीच मृत्यू झाला आहे. रणजित रॉय (वय २५) असे मृत्यू झालेल्या तरुणाचे नाव आहे.
मिळालेल्या माहितीनुसार मृत रणजीत याला गुटख्याचे व्यसन जडले होते. त्यातच तो मद्यपान करत होता. गुरुवारी (२१ फेब्रुवारी) सकाळच्या सुमाराला गुटखा खाल्ल्याने तो अत्तरवाला कॉम्प्लेक्स या इमारतीच्या पहिल्या मजल्यावरून थुंकायला गेला होता. तेव्हा थुंकताना त्याचा तोल गेल्याने तो पहिल्या मजल्यावरून खाली पडला. त्याच्या डोक्याला गंभीर दुखापत झाल्याने त्याचा जागीच मृत्यू झाला. या घटनेची माहिती मिळताच शांतीनगर पोलीस घटनास्थळी दाखल झाले. मृतदेह शवविच्छेदनासाठी स्व. इंदिरा गांधी उपजिल्हा रुग्णालयात पाठवण्यात आला आहे.
दरम्यान मृत रणजीत हा मद्यपान केलेल्या अवस्थेत गुटखा खाऊन थुंकताना त्याचा तोल गेला. त्याचा जागीच मृत्यू झाल्याचे स्थानिक नागरिकांकडून सांगण्यात येत आहे. या घटनेची नोंद शांतीनगर पोलीस ठाण्यात करण्यात आली आहे. पोलीस अधिक तपास करत आहेत.
