ठाणे - कोरोनाविरूद्ध लढण्यासाठी अतिरिक्त कुमक म्हणून ठाणे शहर व ग्रामीण पोलीस दलासोबत होमगार्डच्या सदस्यांचे पाचारण करण्यात आले होते. आता तब्बल 38 दिवसांची सेवा बजावल्यानंतर या सर्व होमगार्ड्सची सेवा 3 मेपासून स्थगित करण्याचे आदेश जिल्हा समादेशक यांनी दिले आहेत. होमगार्डच्या सेवा स्थगितीबाबतच्या वृत्ताला पोलीस उपायुक्त बाळासाहेब पाटील यांनी दुजोरा दिला आहे.
ठाणे शहर पोलीस दलातील 7 ते 8 हजार पोलीस कर्मचारी आणि अधिकारी ठाणे, भिवंडी, डोंबिवली, कल्याण, उल्हासनगर, अंबरनाथ आणि बदलापूर शहरात अहोरात्र कर्तव्य बजावत आहेत. यातील 60 हून अधिक पोलीस अधिकारी व कर्मचाऱ्यांना कोरोनाचा संसर्ग झाल्यामुळे कोरोना बंदोबस्तासाठी 500 होमगार्ड 27 मार्चपासून रुजू केले होते. कर्तव्यावर हजर झालेल्या या होमगार्ड्सचे मानधन जिल्हाधिकारी आपत्ती व्यवस्थापन निधीतून देण्यात येणार आहे.
