ठाणे : तक्रारदार प्रिया सक्सेना ह्या कल्याण शीळ मार्गावरील हायप्रोफाईल सोसायटी असलेल्या पलावा सिटीमध्ये राहतात. त्या १२ जानेवारी रोजी आरोपी सिमरनसोबत नवी मुंबई भागातील कामोठे येथे नातेवाईकांकडे एका कार्यक्रमासाठी गेल्या होत्या. मात्र, १३ जानेवारीला रात्री नऊच्या सुमारास कार्यक्रमातील गर्दीचा फायदा घेऊन आरोपी मावस बहीण सिमरनने प्रियाच्या पर्समधून घराची, तिजोरीची चावी आणि एंट्री कार्ड चोरी केले. विशेष म्हणजे, आपली चोरी पकडू नये म्हणून प्रिया यांचा वन पीस ड्रेस तिने परिधान केला होता. याशिवाय सोसायटीमधील सीसीटीव्हीमध्ये आपला चेहरा दिसू नये, यासाठी तिने चेहऱ्याला स्कार्फ देखील बांधला होता. त्यानंतर चोरलेल्या चावीने बंद घराचे कुलूप उघडून घरात प्रवेश करत २० लाखांचे ४० तोळे दागिन्यांची चोरी केली. विशेष म्हणजे, दागिने लंपास करून आरोपी सिमरन पुन्हा नवी मुंबईतील त्याच कार्यक्रमात पोहचली. त्याआधी तिने चोरी केलेले सर्व दागिने एका डॉक्टर मित्राकडे ठेवायला दिले होते.
बहिणीवरच चोरीचा होता संशय : तक्रारदार प्रियाने आपली पर्स काही घेण्यासाठी उघडली असता, पर्समधील चाव्या आणि एंट्री कार्ड गायब असल्याचे समजले. संशय आल्याने तिने घरी पोहोचल्यानंतर तिजोरी उघडून पहिले असता, त्यामधील सर्वच दागिने चोरीला गेल्याचे कळले. तक्रारदाराने १३ जानेवारी रोजी मानपाडा पोलीस ठाण्यात धाव घेत चोरीची तक्रार दाखल केली आणि मावस बहिणीवर संशय व्यक्त केला. तर गुन्ह्याचे गांभीर्य ओळखून सहाय्यक पोलीस आयुक्त सुनील कुराडे, मानपाडा पोलीस ठाण्याचे वरिष्ठ पोलीस निरीक्षक शेखर बागडे यांच्या मार्गदर्शनाखाली सहाय्यक पोलीस निरीक्षक अविनाश वनवे आणि पथकाने तपास सुरू केला.
चपलेवरून चोर महिलेस पकडले : पोलीस पथकाला पलावा सिटी परिसरातील सीसीटीव्ही फुटेज आणि तांत्रिक तपासणीत मावस बहीण सिमरन पाटील हिची वागणूक संशयास्पद जाणविली. तसेच घटनेच्या दिवशी तिने अंगावरील ड्रेस बदलला असल्याचे पोलिसांना लक्षात आले. मात्र, चप्पल तीच असल्याने पोलिसांची शंका अधिकच वाढल्याने सिमरनला तातडीने चौकशीसाठी ताब्यात घेण्यात आले. पोलीस चौकशी दरम्यान सिमरननेच दागिने चोरल्याचे उघडकीस आले. त्यानंतर चोरीच्या गुन्ह्यात आरोपी सिमरन पाटील हिला १५ जानेवारी रोजी अटक करून तिच्याकडून २० लाख रुपये किमतीचे ४० तोळे सोन्याचे दागिने जप्त करण्यात आले.
24 तासांत लावला चोरीचा छडा : विशेष म्हणजे, आरोपी मावस बहीण सिमरन ही गेली १५ दिवसांपासून प्रिया यांच्याकडे राहत होती. त्यावेळी तिने संपूर्ण घराची रेकी केल्याचे तपासात समोर आले. पोलीस तपासानंतर २० लाख रुपयांच्या दागिने चोरीचा गुन्हा २४ तासांमध्ये उघडकीस आणण्यात मानपाडा पोलीस ठाण्याच्या पोलिसांना यश आले.
हेही वाचा : Thane Crime : कोयत्याने केक कापून दहशत माजवणाऱ्या बर्थडे बॉयला अटक; धारदार कोयताही जप्त
