ठाणे - मनपाच्या सहाय्यक आयुक्त कल्पिता पिंपळे यांच्यावर झालेल्या प्राणघातक हल्ल्यानंतर ठाण्यात फेरीवाल्यांवर मोठ्या प्रमाणात कारवाई दिसून आली. पिंपळे यांच्यावर ठाण्यातील खासगी रुग्णालयात उपचार सुरू आहेत. यानंतर प्रमुख राजकीय नेत्यांनी कल्पिता पिंपळे यांची भेट घेऊन विचारपूस केली. तर आज (शुक्रवारी) मुख्यमंत्री उद्धव ठाकरे यांनी कल्पिता पिंपळेंना फोन करून तब्येतीची विचारपूस केली. यावेळी महापौर नरेश म्हस्के आणि ठाणे पालिका आयुक्त विपीन शर्मा हे रुग्णालयात उपस्थित होते.
तुम्ही चिंता करू नका, लवकर बरे व्हा -
मुख्यमंत्री उद्धव ठाकरे यांनी कल्पिता पिंपळे यांचं कौतुक करत,"तुम्ही लवकर बऱ्या व्हा, बऱ्या झाल्यावर तुम्ही पुन्हा जे काम करणार आहात आता तुमच्याबरोबर आमचीसुद्धा ती जबाबदारी असेल", असा शब्द मुख्यमंत्र्यांनी पिंपळे यांना दिला. त्यानंतर कल्पिता यांनी बरे झाल्यावर लगेच रुजू होणार असल्याचे मुख्यमंत्र्यांना सांगितले. त्यावर मुख्यमंत्र्यांनी 'तुम्ही चिंता करू नका, लवकर बरे व्हा' असे सांगितले.
यावेळी पालिका आयुक्तांकडून अतिक्रमण विभागाच्या सुरू असलेल्या कारवाईची मुख्यमंत्र्यांनी माहिती घेतली. जी घटना घडली तशी हिंमत पुन्हा कोणाची होता कामा नये आणि त्यासाठी कठोर कारवाई करण्याचे आदेश मुख्यमंत्री उद्धव ठाकरे यांनी ठाणे पालिका आयुक्त विपिन शर्मा यांना दिले. त्यामुळे येणाऱ्या काळात फेरीवाल्यांविरोधात कारवाई अशीच सुरू राहील का? हेदेखील पाहणे महत्त्वाचे ठरणार आहे.
हेही वाचा - कल्पिता पिंपळे हल्ल्यानंतर ठाणे महापालिका अतिक्रमण विभागाकडून कारवाईला सुरुवात
आम्ही हल्ले सहन करणार नाही -
ठाण्यात पालिका प्रशासन आपले योग्यरित्या काम आणि कारवाया करत आहे. यामुळे कोणी आमच्या कर्मचारी आणि अधिकाऱ्यांवर हल्ला करत असेल तर आम्ही हे सहन करणार नाही जशास तसे उत्तर दिले जाईल, असेही यावेळी आयुक्तांनी जाहीर केले.
