ठाणे - भिवंडी महापालिका क्षेत्रातील सर्वोदय सोसायटीच्या वाहनतळाच्या जागेवर अतिक्रमण करून माजी नगरसेवकाने भव्य कार्यालय उभारले होते. त्यानुसार या गैरप्रकाराबाबात न्यायालयात खटला लढला गेला आणि न्यायालयाच्या आदेशानुसार पालिका प्रशासनाने या अवैध कार्यालयावर रविवारी बुलडोजर फिरवून कार्यालय उद्ध्वस्त केले.
हेही वाचा - भिवंडीत दोघा भावांना विवस्त्र केल्याचे चित्रीकरण, चौघांना अटक
महेश कृष्णा जगताप असे अवैध कार्यालय उद्ध्वस्त केलेल्या माजी नगरसेवकाचे नाव आहे. जगताप हे २०११ मध्ये कासार आळी येथील सर्वोदय नागरी सोसायटीच्या वाहनतळाच्या मोकळ्या जागेवर अतिक्रमण करून भव्य असे संपर्क कार्यालय उभारले होते. या अवैध कार्यालयाविरोधात सोसायटीचे अध्यक्ष विनोद गायकवाड यांनी मुंबई उच्च न्यायालयात याचिका दाखल केली होती. त्यामध्ये न्यायालयाने संबंधीत अवैध बांधकाम तोडून सोसायटीची जागा मोकळी करून देण्याचे आदेश पालिका प्रशासनाला दिले होते. त्यामुळे न्यायालयाच्या आदेशाची दखल घेऊन पालिका आयुक्त डॉ. प्रविण आष्टीकर यांनी प्रशासनाला अवैध कार्यालयाचे बांधकाम तत्काळ बाजूला करण्याचे निर्देश दिले होते.
सहाय्यक आयुक्त सोमनाथ सोष्टे, बाळाराम जाधव, शमीम अंसारी, सुदाम जाधव, सुनिल भोईर आदींनी अतिक्रण पथक कर्मचारी व बुलडोजर मशीनच्या सहाय्याने कारवाई केली. अवैध कार्यालयाचे बांधकाम हटवले. यावेळी घटनास्थळी अनुचित प्रकार घडू नये यासाठी पालिकेच्या खासगी सुरक्षा यंत्रणेचा फौजफाटा तैनात करण्यात आला होता.
हेही वाचा - ठाण्यात युवकांचा अनोखा उपक्रम, किल्ल्यांच्या संवर्धनाने दिवाळी साजरी
