ठाणे - भिवंडी महापालिकेत महापौर पदावर कोणार्क आघाडीच्या प्रतिभा पाटील आणि काँग्रेसच्या फुटीर गटाचे नगरसेवक इम्रान वली खान यांना भाजपच्या २० नगरसेवकांनी मतदान केले आहे. यावर भाजपचे भिवंडी पश्चिमचे आमदार महेश चौघुले यांनी शिवसेनेवर टीका केली आहे. राज्यात शिवसेनेने जे केले, ते भिवंडीत होऊ देणार नाही. ही भिवंडी आहे, येथे कोणाचे चालणार हे भाजपच ठरवेल, त्यामुळे शिवसेनेने समजून घ्यावे, असा इशारा चौघुले यांनी दिला. काँग्रेसच्या फुटीर उपमहापौराला केलेल्या मतदानाचे त्यांनी समर्थन केले.
हेही वाचा - ठाण्यात धुळखात पडलेल्या गाड्यांवर विनोद रेखाटले, गाड्या हटवण्याची मागणी
तत्कालीन महापौर जावेद दळवी यांच्यामुळे शहराची वाताहत झाली असून, त्यांनी विकासाचे कुठलेही कामे केले नाही. त्यामुळे माझ्यासह १८ नगरसेवकांनी हा निर्यण घेतला. तसेच कोणार्क आघाडीच्या प्रतिभा पाटील यांना मतदान करण्याचा व्हिप आम्हाला असल्याचे काँग्रेसचे फुटीर गटाचे नगरसेवक इम्रान वली खान यांनी सांगितले.
दरम्यान, राज्यात महाविकास आघाडीची सत्ता आली आहे. त्यामुळे राज्यातील सर्वच स्थानिक स्वराज्य संस्थांमध्ये हाच सत्तेचा पॅटर्न समोर येणार असल्याचे चित्र काही ठिकाणी दिसून आले. मात्र, भिवंडी महापालिकेत केवळ चार नगरसेवक असलेल्या कोणार्क विकास आघाडीने भाजप, समाजवादी, रिपाई ऐक्य, अपक्ष आणि १८ फुटीर काँग्रेसच्या नगरसेवकांशी केलेल्या सौदीबाजीमुळे आज कोणार्क विकास आघाडीच्या प्रतिभा पाटील महापौर तर उपमहापौर पदी इम्रान वली खान विजराजमान झाले. मात्र, पालिकेच्या महापौर व उपमहापौर पदाच्या निवडणुकीतील राजकीय उलथापालथीमुळे काँग्रेसचे स्थानिक पातळीवर मोठे नुकसान झाले आहे.
हेही वाचा - माथाडी कामगारांच्या १०० कोटींच्या ठेवी लाटल्या? सीबीआय चौकशीची मागणी
काँग्रेसचे फुटीर १८ नगरसेवक कोणार्क विकास आघाडीच्या मार्गावर?
भिवंडी महापालिकेच्या महापौर व उपमहापौर पदाच्या झालेल्या निवडणुकीत काँग्रेस पक्षाच्या १८ नगरसेवकांनी उघडपणे भाजपप्रणित कोणार्क विकास आघाडीच्या उमेदवार प्रतिभा विलास पाटील यांना मतदान केले. त्यामुळे आगामी काळात हे नगरसेवक स्वतंत्र गट स्थापन करून भाजपला सहकार्य करणार आहेत. काँग्रेसचे फुटीर नगरसेवक इम्रान खान, मिस्बाह खान, मलिक मोमीन, अर्शद उर्फ फरिश्ते अन्सारी, हुस्ना परवीन याकूब, अहमद सिद्दीकी, अंजुमन सिद्दीकी, मतलुब सरदार खान, मोहम्मद याकूब शेख, राबिया दानिश अंसारी, तफज्जुल अंसारी, नसरुल्ला अंसारी, रईस कानपुरी अंसारी, शमीना शाहिद लवा अंसारी, नम्रा औरंगाजेब अंसारी, शबनम मेहबूब अंसारी, जरीना तवाब अंसारी, शिफा अशफाक अंसारी या 18 नगरसेवकांनी काँग्रेस पक्षाच्या नेतृत्वाला कंटाळून अखेर आपला मार्ग बदलून कोणार्क विकास आघाडीच्या गोटात सामील झाले आहेत. त्यामुळे भिवंडी शहरातील राजकारणाला वेगळी कलाटणी मिळाली आहे. लोकसभा, विधानसभा पाठोपाठ महापौरपदाच्या निवडणुकीत काँग्रेसचा पराभव झाला आहे.
दरम्यान, काँग्रेसच्या राज्य पातळीवर नेत्यांनी या फुटीर नगरसवेकांची गांभीयाने दखल घेतली असून त्यांची पक्षातून हकालपट्टी करून त्यांचे नगरसेवक पद रद्द करण्यासाठी पुढील प्रकिया सुरु केल्याची माहिती कॉग्रेसचे जिल्हाध्यक्ष शोहेब गुड्डू यांनी दिली आहे.
