ठाणे - जिल्ह्यात शुक्रवारी सायंकाळपासून मुसळधार पाऊस बरसत असल्यामुळे भातसा धरणाच्या पाणी पातळीत मोठ्य प्रमाणात वाढ झाली आहे. परिणामी धरणाचे दरवाजे १.५ मीटरने उघडण्यात आले आहेत. त्यामुळे खबरदारीचा उपाय म्हणून भातसा नदीच्या काठी राहणाऱ्या गावकऱ्यांना सतर्कतेचा इशारा देण्यात आला आहे.
मुसळधार पावसामुळे भातसा धरणाचे दरवाजे उघडले
रात्रभर बरसत असलेल्या या मुसळधार पावसामुळे भातसा नदीला महापूर आला आहे. त्यातच भातसा धरणाचे दरवाजे १.५ मीटरने उघडण्यात आल्याने नदीला आणखी उफान आले आहे. त्यामुळे भातसा धरण क्षेत्रातील सापगाव जवळचा पूल पुराच्या पाण्याखाली गेल्याने यावरील वाहतूक बंद करण्यात आली आहे. पूल बंद झाल्याने 6 ते 7 गावाचा शहापूर शहराशी संपर्क तुटला आहे.
