सोलापूर - २००९ ला माढ्यातून लोकसभा निवडणूक लढताना शरद पवार यांनी माढ्याची बारामती करू असे आश्वासन दिले होते. या आश्वासनाचे पुढे काय झाले? असा सवाल सहकारमंत्री सुभाष देशमुखांनी उपस्थित केला. माढा लोकसभा मतदारसंघातून शरद पवार लढणार हे निश्चित झाले आहे. याबद्दलचा प्रश्न विचारल्यावर देशमुख यांनी पत्रकारांना उत्तर देताना हे वक्तव्य केले.
शरद पवारांच्या विरोधात कोण उभे राहणार याची चर्चा जोर धरत आहेत. वेगवेगळ्या नावांची चर्चा असली तरी सुभाष देशमुख यांना पर्याय नाही, असा सूर भाजपच्या गोटातून निघत आहे. २००९ च्या निवडणुकीत सुभाष देशमुख यांना पवारांच्या विरोधात अडीच लाख मते मिळाली होती. देशमुख यांना उमेदवारीबाबत विचारले असता, याचा निर्णय पक्ष घेईल असे सावध उत्तर त्यांनी दिले.
पुण्यातल्या घोषनेनंतर पवार उद्या माढ्यात आमदार बबनराव शिंदे यांच्या गावानजीक पिंपळनेर येथे कार्यकर्ता मेळावा घेत आहेत. शिवाय निमगावात निवडक लोकांशी बंद खोलीत चर्चाही करणार आहेत. त्या पार्श्वभूमीवर सहकारमंत्र्यांना हा सवाल उपस्थित करून पवारांना अडचणीत टाकणाऱ्या दुखऱ्या नशेवर बोट ठेवले आहे, अशी चर्चा होत आहे.
