सोलापूर - टेंभुर्णी-अहमदनगर राज्यमार्गावर करमाळा तालुक्यातील कुंभेज फाट्या जवळचा अरुंद पूल आणि रस्ता मृत्यूचा सापळा बनला आहे. अरुंद रस्त्याचा अंदाज न आल्याने कार पुलावरून थेट 70 फूट खोल कालव्यात कोसळली. या अपघातात एक जण जागीच ठार तर एक जखमी झाला आहे. यापूर्वी या पुलावरून जळगाव जिल्ह्यातील एक जीप रस्त्याचा अंदाज न आल्याने कालव्यात कोसळली होती. त्या अपघातामध्ये तीन जण ठार झाले होते.
स्वाती साईकुमार रेड्डी जक्का (वय 28 वर्षे) हीचा जागीच मृत्यू झाला तर तिचा पती साईकुमार सतीश रेड्डी जक्का (वय 29 वर्षे, दोघे रा. बंगळूर, हल्ली मुक्काम गोरेगाव वेस्ट, मुंबई) हे जखमी झाले. मंगळवारी (दि 3 डिसेंबर) सायंकाळी सात वाजण्याच्या सुमारास शिर्डीहून बंगळूरकडे चारचाकीमधून रेड्डी पती-पत्नी दोघे जात होते. करमाळा तालुक्यातील कुंभेज फाट्याजवळ कारचालक साईकुमार याला रस्त्याचा अंदाज न आल्याने पुलावरून कार थेट 70 फूट खोल कालव्यात कोसळली. या दुर्घटनेत नवदांपत्यापैकी स्वाती जागीच ठार झाली. तर अपघातानंतर कार मधील एअरबॅग उघडल्याने पती साईकुमार बचावला आहे. या ठिकाणी धोकादायक सूचना फलक लावलेला नाही. उंच संरक्षक कठडेही नाहीत.
हेही वाचा - सोलापुरात गॅस सिलिंडरचा स्फोट, 4 जण गंभीर जखमी
टेंभुर्णी-अहमदनगर राज्यमार्गावरील टेंभुर्णी ते जातेगाव या 65 किमी अंतर रस्त्याच्या चौपदरीकरणाचे काम खासगीकरणातून सुप्रीम कंपनीने घेतले होते. पण, गेल्या पाच वर्षांपासून कंपनीने काम बंद केले आहे. या मार्गावर अर्धवट रस्त्याची कामे धोकादायक पुल याकडे दुर्लक्ष होत असून सार्वजनिक बांधकाम विभाग नुसते खड्डे बुजवण्यात धन्यता मानत आहेत. कुंभेज फाट्याजवळ असलेल्या कालव्यावरील पुलाचा रस्ता अत्यंत अरुंद असून चार पदरी असलेला रस्ता लगेच अरुंद होत असल्याने परप्रांतीय वाहनचालकांना भरधाव वेगात रस्त्याचा अंदाज येत नाही. यामुळे अपघात होतात.
हेही वाचा - सोलापूर : माढा तालुक्यात दोन बालविवाह रोखण्यात प्रशासनाला यश
