सोलापूर - शहरात बुधवारी राष्ट्रीय हातमाग दिन मोठ्या उत्साहात साजरा करण्यात आला. यानिमित्ताने शहरातील विणकर बागेमध्ये असलेल्या विणकरांच्या पुतळ्याला पुष्पहार अर्पण करून अभिवादन करण्यात आले.
केंद्र सरकारने २०१५ पासून भारतात ७ ऑगस्टला राष्ट्रीय हातमाग दिन म्हणून मान्यता दिली आहे. तेव्हापासून सोलापुरात हातमाग दिन साजरा करण्यात येत आहे. तर बुधवारी यानिमित्ताने सोलापूरच्या महापौर शोभा बनशेट्टी यांच्या हस्ते विणकर बागेतील विणकाम करणाऱ्या कारागीरांच्या पुतळ्याला पुष्पहार अर्पण करण्यात केला.
हातमाग दिनाचा इतिहास
कलकत्ता शहरातील प्रसिद्ध असलेल्या टाऊन हॉलमध्ये ७ ऑगस्ट १९०५ रोजी महाराजा महिंद्र चंद्रनंदी यांच्या अध्यक्षतेखाली पश्चिम बंगालच्या विभाजनाला विरोध करण्यासाठी स्वदेशी जागरण कार्यक्रम आयोजित करण्यात आला होता. या कार्यक्रमात इंग्लडहून आयात करण्यात आलेल्या विदेशी वस्त्रांवर बहिष्कार घालून स्वदेशी वस्त्रे वापरावे, हा निर्णय घेण्यात आला. यालाच अनुसरुन भारतातील विविध प्रातांत हातमाग सोसायटी स्थापन झाल्या. त्यावेळच्या राजकीय पक्षानेदेखील अनधिकृतपणे ७ ऑगस्ट हा दिन हातमाग दिवस म्हणून साजरा करत होते.
हातमाग दिन हा राष्ट्रीय पातळीवर साजरा व्हावा, यासाठी रापोलू आनंद भास्कर यांनी विविध राज्यात फिरून याची माहिती गोळा केली. यासाठी आंध्रप्रदेशातील हातमाग संघटनेच्या नेत्यांना एकत्रित करून त्यांनी हातमागविषयी राष्ट्रीय दिन साजरा करण्यासाठी प्रयत्न केले. त्यानंतर रापोलू भास्कर हे राज्यसभेवर सदस्य म्हणून गेले. राज्यसभेचे सदस्य झाल्यानंतर त्यांनी केलेल्या प्रयत्नामुळे केंद्र सरकारने २०१५ मध्ये ७ ऑगस्टला राष्ट्रीय हातमाग दिन म्हणून अधिकृत घोषित केले.
सोलापुरात महत्व
१८ व्या शतकापासून आंध्रप्रदेशातून अनेक विणकर लोक सोलापुरात येऊन स्थायिक झाले आहेत. तर या विणकर समाजाच्यावतीने सोलापुरात मागील अनेक वर्षापासून हातमाग दिन साजरा करण्यात येत आहे.
