पंढरपूर (सोलापूर) - 'आली आली गौराई, सोनरुप्याच्या पावली' गणपतीचे आगमन झाल्यानंतर तिसऱ्या दिवशी गौरीचा सणही महाराष्ट्रात मोठ्या प्रमाणात साजरा होतो. राज्यातील सर्व समाज बांधव समभावाने गणेश उत्सव साजरा करतात. पंढरपुरातील कैठाळी येथील मुस्लिम समाजातील इनामदार कुटुंबीय 22 वर्षापासून भक्तीभवाने गणपती बरोबर गौराईचे घरात आगमन करतात. गौरीच्या आगमनापासून ते गौरी विसर्जनापर्यंत सर्व कार्य इनामदार कुटुंबांकडून परंपरेनुसार केली जाते. यातून हिंदू मुस्लिम सामाजिक एकतेचा संदेश देण्याचा प्रयत्न इनामदार कुटुंबीयांकडून केला जातो.
22 वर्षापासून नित्यनेमाने गणरायाची प्रतिष्ठापना -
जावेद गुलाब इनामदार हे 22 वर्षापासून नित्यनेमाने गणरायाची प्रतिष्ठापना करून पूजन करतात. यामध्ये इनामदार कुटुंबियातील लहानथोर उत्साहाने सहभाग घेतात. इनामदार कुटुंबीयांकडून आठ दिवस आधीच गणेशोत्सवाची लगबग सुरू होत असते. गणेश उत्सव सण वर्षातून एकदा येत असल्यामुळे परंपरेनुसार कार्य केले जाते.
इनामदार कुटुंबीयाकडून परंपरेनुसार गौरीपूजन -
राज्याच्या विविध भागांत वेगवेगळ्या प्रकारांमध्ये गौरी बसवल्या जातात. काही ठिकाणी गौरी पाटावर बसवतात. पंढरपूर तालुक्यातील इनामदार कुटुंबीय गणपतीचे आगमन आधी करत असतात. त्यानंतर तीन दिवसानंतर गौरीचे भक्तिभावाने आगमन केले जाते. त्या गौरीच्या आगमनापासून ते गौरीच्या विसर्जनापर्यंत भक्तिभावाने व परंपरेनुसार गौरीची पूजन इनामदार कुटुंबीयांकडून केले जाते. यातून हिंदू-मुस्लिम एकतेचा संदेश देण्याचा उद्देश इनामदार कुटुंबीयांकडून केला जातो.
हेही वाचा - Gauri Festival : आज ज्येष्ठा गौरी पूजन; विदर्भात आंबिल, फळांच्या नैवेद्याला महत्व
