पंढरपूर (सोलापूर) - बार्शी-भूम रोडवर आगळगाव येथे मोटारसायकल घसरून झालेल्या अपघातात पती जागीच ठार, तर पत्नी गंभीर जखमी झाल्याची घटना घडली आहे. हा अपघात मंगळवारी (१० नोव्हेंबर) सायंकाळी आठ वाजण्याच्या सुमारास घडला. दगडू येदा जाधवर (वय 60 रा. बोरगाव ता बार्शी) असे मृत दुचाकी चालकाचे नाव आहे.
दिवाळीचा बाजार आणण्यासाठी जाधवर दाम्पत्य आगळगावला जात असताना ही दुर्दैवी घटना घडली.
दगडू जाधवर व त्यांची पत्नी निर्मला जाधवर हे मंगळवारी सायंकाळी सहा वाजण्याच्या सुमारास बोरगाव येथून दुचाकीवरून (एमएच १३ बीसी ५९८२) दिवाळीचा बाजार आणण्यासाठी आगळगावला गेले होते. त्यानंतर माघारी परतत असताना आगळगावपासून एक किलोमीटर अंतरावर राजगड हॉटेलच्या पुढे आले असता, समोर एक अज्ञात वाहन उभे असलेल्या वाहनाकडे अचानक त्यांची नजर गेली आणि त्या वाहनाची धडक चुकवण्याच्या प्रयत्नात त्यांची दुचाकी घसरली गेली.
दुचाकी घसरल्याने जाधवर दाम्पत्य रस्यावर पडले. त्यात जाधवर यांच्या डोक्याला गंभीर मार लागल्याने ते जागीच ठार झाले. तर त्यांच्या पत्नी निर्मलाबाई या गंभीर जखमी झाल्या. त्यानंतर घटनास्थळी उपस्थित असलेल्या नागरिकांनी त्यांना तातडीने जगदाळे मामा रुग्णालयात दाखल केले.
