सोलापूर - उजनी धरणातील पाणी साठा हा 'प्लस'कडे चालला आहे. उजनी धरणातील पाणी पातळी 10 जुलैला दुपारपर्यंत वजा 5 टक्केपर्यंत होती. उजनी धरणात सध्या दौंड येथून 4 हजार 683 क्यूसेक पाण्याचा विसर्ग येत आहे. धरणात येणाऱ्या पाण्याचा वेग वाढला की आज रात्री धरण हे 'प्लस'मध्ये येण्याची शक्यता आहे.
सोलापूर जिल्ह्यातील उजनी धरणात येणारे पाणी हे पुणे जिल्ह्यातून येते. धरण क्षेत्रात पडणाऱ्या पावसामुळे उजनी धरणातील पाणी पातळी ही प्लसमध्ये येत आहे. सोलापूर जिल्ह्यातील शेतकऱ्यांची वरदायिनी म्हणून ओळख असलेल्या उजनी धरणातील पाणीसाठा हा पुणे जिल्ह्यातील पडणाऱ्या पावसावर अवलंबून असतो. उजनीच्या धरण क्षेत्रामध्ये दमदार पाऊस झाल्यावरच उजनीतील पाणीसाठा वाढतो. उजनी धरणाच्यावर पुणे जिल्ह्यात देखील धरण आहेत. पुणे जिल्ह्यात होणाऱ्या पावसाकडे सोलापूर जिल्ह्यातील शेतकऱ्यांचे डोळे लागलेले असतात. सध्या भीमा, सीना आणि नीरा या नदीच्या खोऱ्यामध्ये अपेक्षित पाऊस पडत नाही.
एक जून ते दहा जुलैपर्यंत धरण क्षेत्रामध्ये एकूण 272 मिलिमीटर पावसाची नोंद झाली आहे. अजूनही भीमा व नीरा नदीच्या खोऱ्यामध्ये दमदार पावसाची गरज आहे. धरण क्षेत्रावर झालेल्या जोरदार पावसामुळे उजनीत येणाऱ्या पाण्याचा साठा वाढण्याकडे सोलापूर जिल्ह्यातील शेतकऱ्यांचे डोळे लागलेले आहेत.
पुणे जिल्ह्यात पडणाऱ्या पावसावरच उजनी धरणातील पाणीसाठा अवलंबून असल्यामुळे सोलापूर जिल्ह्यातील शेतकऱ्यांचे लक्ष हे पुणे जिल्ह्यातील पावसाकडे लागलेले आहे. दहा जुलैला दुपारपर्यंत पुणे जिल्ह्यातील दौंड येथून उजनी धरणामध्ये चार हजार 683 क्यूसेक पाणी धरणात येत आहे. पुणे जिल्ह्यात पडणाऱ्या पावसामुळे उजनी धरणात येणाऱ्या पाणीसाठ्यात वाढ होईल आणि लवकरच उजनी धरणाची वाटचाल प्लसमध्ये यायला सुरुवात होईल अशी अपेक्षा नागरिक करत आहेत.
