सोलापूर : आमदार सुभाष देशमुख यांनी त्यांच्या मतदारसंघात जनसंवाद सुरू केला आहे. दरम्यान, दक्षिण सोलापूर तालुक्यात अवैध धंद्याने जोर पकडला आहे. यापूर्वीही भाजप आमदार सुभाष देशमुख यांनी दक्षिण सोलापूर तालुक्यातील बोलकवठे गावातील अवैध दारूच्या भट्ट्या बंद करण्याची मागणी केली होती. आमदार सुभाष देशमुख यांनी मंद्रूप पोलीस ठाण्याच्या पोलीस निरीक्षकांना या संदर्भात बोलावून घेतले होते. त्यानंतर आता दारूबंदीच्या मागणीसाठी दक्षिण सोलापूर तालुक्यातील विंचूर गावात अवैध हातभट्टी दारू व्यवसायामुळे संतप्त महिलांनी भाजप आमदार सुभाष देशमुख यांना रोखले. माझ्या मतदारसंघातील हातभट्ट्या लवकरात लवकर बंद करण्याच्या सूचना देण्यात आल्या आहेत, असे त्यांनी महिलांना सांगितले.
सुभाष देशमुखांचा ताफा अडवून तीव्र संताप : आ. सुभाष देशमुख 22 जून रोजी दक्षिण सोलापूर तालुक्यातील कुसुर, विंचुर या दोन गावांची भेट घेत परत जात होते. विंचूर गावातील महिलांनी सुभाष देशमुखांचे वाहन अडवून दारू बंदीची मागणी केली. या गावात दारूची खुलेआम विक्री होत असून येथील पुरुष आणि तरुण मुले व्यसनाच्या आहारी जात आहेत. त्यामुळे येथील दारु विक्री बंद करण्याच्या मागणीसाठी महिलांनी संताप व्यक्त केला. आमदार सुभाष देशमुख यांनी यावेळी पोलीस अधीक्षक शिरीष सरदेशपांडे यांना फोन लावून यासंदर्भात कल्पना दिली. लवकरच येथील सर्व अवैध धंदे बंद करा अशा सूचना त्यांनी दिल्या आहेत.
दुसऱ्यांदा भाजप आमदाराची कोंडी : भाजप आमदार सुभाष देशमुख यांच्या मतदार संघात म्हणजेच दक्षिण सोलापूर तालुक्यात अवैध धंद्याना उत आल्यासारखे चित्र निर्माण झाले आहे. दुसऱ्यादा आ. सुभाष देशमुख यांना अडवून महिलांनी दारू बंदीची मागणी केली आहे. यापूर्वी बोळकवठे गावात एका भूमीपूजनाच्या कार्यक्रमात आ.सुभाष देशमुख गेले असता, त्या ठिकाणी देखील हातभट्टी दारू बंदीची मागणी केली केली होती. आता दक्षिण सोलापूर तालुक्यातील विंचूर गावातुन जातांना महिलांनी आ.सुभाष देशमुखांना अडवून हातभट्टी, तसेच दारू बंदीची मागणी केली आहे. आ. सुभाष देशमुख यांनी ताबडतोब पोलीस अधीक्षकांना फोन लावूंन हातभट्ट्या दारूचे अड्डे उध्वस्त करा अशा सूचना दिल्या आहेत.
हेही वाचा : Devendra Fadnavis : पाटण्यातील विरोधकांच्या बैठकीचा देवेंद्र फडणवीसांनी घेतला समाचार; म्हणाले, मोदी हटाव...
