भीमा नदीचा पूर ओसरतोय; पंढरपूरची वाहतूक लवकरच होणार सुरळीत

उजनी धरणातून भीमा नदीपात्रात सोडण्यात येणाऱ्या पाण्याचे प्रमाण कमी केले आहे. त्यामुळे भीमा नदीचा पूर ओसरू लागला आहे. पंढरपूरची बंद करण्यात आलेली वाहतूक लवकरच सुरू होण्याची शक्यता आहे.

सोलापूर - जिल्ह्यात भीमा नदीला आलेला पूर काही प्रमाणात ओसरायला सुरुवात झाली आहे. पुणे जिल्ह्यातून उजनी धरणात होणारी पाण्याची आवक कमी झाली आहे. त्यामुळे धरणातून भीमा नदीत होणारा पाण्याचा विसर्गही कमी करण्यात आला आहे.

सोलापूर जिल्ह्यात पाऊस न पडल्यामुळे संपूर्ण जिल्हा कोरडा असला, तरी पुणे जिल्ह्यात झालेल्या पावसामुळे भीमा नदीला पूर आलेला आहे. नदीला आलेल्या पुरामूळे नदी काठच्या 94 गावांना पूराचा फटका बसला आहे. दरम्यान, आता पुणे जिल्ह्यातून उजनी धरणात येणारे पाणी कमी झाल्यामुळे उजनीतून पाण्याचा विसर्ग कमी करण्यात आला आहे. त्यामुळे नदीचा पूर ओसरायला सुरुवात झाली असून पंढरपूरची बंद करण्यात आलेली वाहतूक लवकरच सुरू होणार आहे.

धरणातून भीमा नदीत सोडले जाणारे पाणी बुधवारी रात्रीपासून कमी केले आहे. त्यामुळे थोडा पूर ओसरायला सुरुवात झाली आहे. अजूनही भीमा नदीवरील अनेक पूल पाण्याखाली आहेत. मात्र पंढरपूरमधील अहिल्या पूल आणि नवीन पूल वाहतुकीसाठी लवकर खुला होईल, अशी माहिती उजनी धरण व्यवस्थापनाकडून देण्यात आली आहे.

सध्या उजनी धरणातून भीमा नदी पात्रात १ लाख क्यूसेक पाणी सोडले जात आहे. दरम्यान पुणे जिल्ह्यात अतिवृष्टीचा इशारा हवामान खात्याने दिला आहे. त्यामुळे पुणे जिल्ह्यात पाऊस सुरू झाला, तर उजनी धरणातून पुन्हा भीमा नदीमध्ये पाणी सोडावे लागेल अशी सध्याची परिस्थिती आहे.