सोलापूर - करमाळा तालुक्यातील चिखलठाण येथील कांदा उत्पादक शेतकऱ्याला एकवीस गोणी कांदा विकल्यानंतर चक्क कांदा घेणाऱ्या आडत्यालाच १३३ रुपये देण्याची वेळ आली आहे. त्याचा उत्पादन खर्च देखील निघाला नाही. उलट जवळचे पैसे गेले. निसर्गाने अन्याय तर केलाच मात्र, व्यापाऱ्यांनीही आपला सूड उगवल्याने शेतकरी वर्गामध्ये संतापाची लाट उसळली आहे.
गेल्या आठवड्यात कांद्याला ४० रुपये दर मिळाल्याने शेतकरी वर्गाला मोठा आनंद झाला होता. त्यामुळे शेतकऱ्यांनी सोलापूर कृषी उत्पन्न बाजार समितीमध्ये कांदा विकण्यासाठी गर्दी केली होती. करमाळा येथील शेतकरी राहुल गव्हाणे यांनी आपल्या शेतातील एकवीस गोणी कांदा बाजारसमितीमध्ये विकण्यासाठी आणला होता. कांद्याला चांगला दर मिळाला, तर ते गावाकडे जाताना सोलापूरवरून कुटुंबीयांसाठी कपडे घेऊन जाणार होते. मात्र, कांद्याची पट्टी त्यांच्या हातात मिळाली आणि त्यांना धक्काच बसला. त्यांचा कांदा २ रुपये किलो दरापेक्षा जास्त दराने विकू शकला नाही. ३ गोण्या तर फुकटच द्याव्या लागल्या. मात्र, गाडीचे भाडे, हमाली, तोलाई, वारणी असा इतर खर्च १ हजार ४७६ रुपये झाला. मात्र, २१ गोणी कांद्यापासून त्यांना फक्त १ हजार ३४३ रुपये मिळाले. बेरीज वजाबाकीचे गणित झाल्यानंतर त्यांना स्वत: जवळचे १३३ रुपये आडत दुकानदाराला देण्याची वेळ आली. मात्र, दुकानदाराने शेतकऱ्याकडून पैसे घेतले नाही. तरीही मी कांद्याचे उत्पादन का घेतले? हा प्रश्न सतत गव्हाणे यांना सतावत होता.
परतीच्या पावसाने सर्वच शेतकऱ्यांचे मोठ्या प्रमाणात नुकसान -
परतीच्या पावसामुळे शेतकऱ्यांच्या शेतातील पिकांची नासाडी झाली आहे. खरीप हंगाम वाया गेला आहे. करमाळा भागात जास्त करून कांद्याचे पीक आहे. मात्र, पावसाने काही शेतकऱ्यांना कांदा पीक शेतातून काढता आले नाही. त्यामुळे पीक शेतातच सडले आहे, तर काढलेल्या कांद्याला नाममात्र भाव मिळत आहे. लागवडीसाठी झालेला खर्चही निघणे मुश्किल झाले आहे. शेतकऱ्यांसमोर मोठे संकट उभे आहे. त्यामुळे शासनाने शेतकऱ्यांना सरसकट मदत करण्याची गरज आहे.
शेतकरी नेते मूग गिळून गप्प -
एरवी शेतकऱ्यांसाठी आंदोलन करणारे नेतेमंडळी मात्र कोठेच दिसेनासे झाले आहेत. काही व्यपाऱ्यांच्या हुशारीमुळे शेतकऱ्यांना अडचणी येत आहेत. त्यांना जरब बसणे गरजेचे आहे. नेतेमंडळी फक्त ऊसासाठीच आंदोलन करताना दिसून येत आहेत. त्यासाठी उठाव होणे गरजचे आहे. आता पूर्ण महाराष्ट्रामध्ये शेतकरी अडचणीत असताना हे नेतेमंडळी मात्र कोठेही दिसून येत नाहीत. फक्त आपल्या नावापुढे पद लावण्यातच यांना धन्यता दिसून येत असल्याचा संताप शेतकऱ्याने व्यक्त केला आहे.
