सोलापूर - काँग्रेसने मागील ६० वर्षात काय केले, असा सवाल देशाचे पंतप्रधान नरेंद्र मोदी यांच्याकडून उपस्थित केला जात आहे. माजी मंत्री दिलीप सोपल यांनी त्यांच्याकडून उपस्थित केलेल्या जाणाऱ्या या प्रश्नाची खुमासदार शैलीत खिल्ली उडवली आहे. मोदी यांच्या म्हणण्याप्रमाणे त्यांनीच ५ वर्षात सर्व काही केले आणि काँग्रेसने काहीच केले नाही, तर माग मोदी सत्तेवर येण्यापूर्वी संपूर्ण महाराष्ट्र काय जंगल होता का? असा प्रश्न सोपल यांनी विचारला आहे.
माढा लोकसभा मतदारसंघाचे राष्ट्रवादी काँग्रेसचे उमेदवार संजय शिंदे यांच्या प्रचारासाठी करकम येथे प्रचार सभा आयोजित करण्यात आली होती. या प्रचार सभेत माजी मंत्री आणि बार्शीचे राष्ट्रवादी काँग्रेसचे आमदार दिलीप सोपल यांनी त्यांच्या खुमासदार शैलीत भाषण करत उपस्थितांना पोट धरून हसायला लावले.
मागील साडेचार वर्षे सत्तेत राहून भाजपला विरोध करणाऱ्या शिवसेनेने महाराष्ट्रातील जनतेला वेड्यात काढण्याचा प्रकार केला आहे. अफजलखानाचा कोथळा काढू, असे म्हणणारे शिवसेना कार्यप्रमुख उद्धव ठाकरे हे त्याच अफजलखानाच्या मिठीत जाऊन प्रेमाच्या गोष्टी करू लागले आहेत, अशी टीका सोपल यांनी केली. उद्धव ठाकरे हे अमित शाहंना काय म्हणाले आणि अमित शहा यांनीदेखील शिवसेनेवर काय टीका केली होती, ते सोपल यांनी त्यांच्या खुमासदार शैलीत सांगितले.
