सोलापूर - शहराच्या प्रवेश द्वारावर सुरू असलेला मटक्याच्या अड्डा शहर गुन्हे शाखेने उध्वस्त केला आहे. वैष्णवी हाईट्स या इमारतीमध्ये मटका खेळला जात होता. या कारवाईत 6 संशयित आरोपींना अटक करण्यात आली आहे. तसेच आरोपींकडून 5 लाख 48 हजारांचा मुद्देमाल जप्त करण्यात आला.
सोलापूर- शहराच्या प्रवेश द्वारावरच मटक्याच्या आकड्यांचा खेळ सुरू होता. याची कुणकुण लागताच गुन्हे शाखेच्या पोलीस पथकाने गुरुवारी मध्यरात्री कारवाई करत सहा संशयित आरोपींना अटक केली. ऑगस्ट आणि सप्टेंबर महिन्यात सुनील कामाठी मटका व जुगार अड्डा कारवाईमुळे शहर हादरले होते. आता पुन्हा एकदा हा मटक्याच्या विषय समोर आला आहे.
अशी केली कारवाई-
सोलापूर शहर गुन्हे शाखेने गुरुवारी मध्य रात्रीच्या सुमारास बाळे येथील वैष्णवी हाईट्स या इमारतीमध्ये धाड टाकली. यावेळी तिथे कल्याण आणि मुंबई नावाचा मटका व्यवसाय सुरू होता. काही इसम मोबाईलद्वारे मटक्याचे आकड्यांचा हिशोब करत होते. तसेच आकडेमोड केलेल्या चिठ्ठ्या त्या ठिकाणी पडलेल्या होत्या. गुन्हे शाखेच्या पोलिसांनी सर्व मुद्देमाल जप्त करून चौकशी सुरू केली. गेल्या अनेक दिवसांपासून हा अवैध व्यवसाय सुरू होता.
कारवाईमध्ये जप्त मुद्देमाल-
पोलिसांनी या कारवाईमध्ये 1 प्रिंटर, 1 मॉडेम, 14 मोबाईल, 4 मोटारसायकल, 1 हिशोबाचे रजिस्टर, मटक्याचे आकडेमोड केलेले चिठ्ठयांचे गठ्ठे, स्टेशनरी साहित्य असा 5 लाख 48 हजार 300 रुपयांचा मुद्देमाल जप्त केला आहे. तसेच सहा संशयित आरोपींना अटक केले आहे.
हे आहेत आरोपी-
यामध्ये सतिशकुमार सौदागर गुंड (वय 39), कुणाल आंबदास बडेकर (वय 30), सागर रवींद्र रेणके (वय 32), संतोष उर्फ रोहित हुंडेकरी, ज्ञानेश्वर रामकृष्ण दरेकर (वय 44), खंडप्पा लक्ष्मण घुगरे (वय 53) यांना अटक केले आहे.
ही कारवाई गुन्हे शाखेचे वरीष्ठ पोलीस निरीक्षक संजय साळुंखे, सहाय्यक पोलीस निरीक्षक ऋषीकेश पवळ,अजित कुंभार, पोलीस उपनिरीक्षक संदीप शिंदे, पोलीस हवालदार बाबर कोतवाल, दिलीप नागटिळक, विनायक बर्डे यांनी केली.
हेही वाचा- वाचा एका क्लिकवर : काय होणार आज दिवसभरात...
हेही वाचा- राज्यात आता खाजगी बसेसला 100 टक्के क्षमतेने प्रवासाची परवानगी
