सिंधुदुर्गात एसटी कर्मचाऱ्यांचे आपापल्या घरीच शासनाविरोधात 'आक्रोश' आंदोलन

एसटी कर्मचाऱ्यांना तीन महिन्यांपासून पगार मिळालेला नाही. शासनाच्या या धोरणाचा निषेध करतानाच आज एसटी कामगार संघटनेने आक्रोश आंदोलन केले आहे. आज सिंधुदुर्गात एसटी कामगार संघटनेच्या पदाधिकारी व सदस्यांनी आपापल्या घरी आक्रोश आंदोलन केले.

सिंधुदुर्ग - एसटी कर्मचाऱ्यांना तीन महिन्यांपासून पगार मिळालेला नाही. पगाराची सात तारीख उलटल्याने कर्मचारी हतबल झाले आहेत. आपली दिवाळी अंधारात घालवावी लागणार असल्याची खंत त्यांना वाटत आहे. शासनाच्या या धोरणाचा निषेध करतानाच आज एसटी कामगार संघटनेने आक्रोश आंदोलन केले आहे. संघटनेच्या पदाधिकारी व कामगारांनी आपापल्या घरीच हे आक्रोश आंदोलन करून शासनाला जाग आणण्याचे काम केले आहे. आज सिंधुदुर्गात एसटी कामगार संघटनेच्या पदाधिकारी व सदस्यांनी आपापल्या घरी आक्रोश आंदोलन केले.

एसटीचे उत्पन्न घटल्याने वेतन मिळत नसल्याने अनेक कामगारांवर घर चालवण्यासाठी भाजीपाला विक्री, भाड्याने वाहन चालवण्याची वेळ आली. अनेकांनी कौटुंबिक अडचण, लग्न समारंभ, घरबांधणी अशा विविध कारणांसाठी कर्ज घेतले आहे. मुळातच कमी वेतन असताना अशा कर्जामुळे कोरोना काळात हप्ते फेडणे अवघड झाले. यामुळेच आक्रोश आंदोलन करण्याची वेळ आली असल्याचे या कर्मचाऱ्यानी यावेळी सांगितले.

सुमारे तीन महिने पगार न मिळाल्याने एसटी कामगारांवर आता अक्षरशः उपासमारीची वेळ येऊन ठेपली आहे. त्यामुळेच आपल्या हक्काचे पैसे मिळावे म्हणून एसटी कर्मचाऱ्यांनी आत्मक्लेश आंदोलन पुकारले आहे. हे आंदोलन आगळ्यावेगळ्या पद्धतीने करण्यात येत असून कर्मचारी चक्क घरात बसून हे आंदोलन करत आहेत.कोरोनाच्या काळात जीवाची पर्वा न करता लोकांना सेवा देणाऱ्या एसटी कर्मचाऱ्यांचा सुमारे तीन महिन्यांचा पगार थकीत असल्यामुळे अनेक समस्यांना तोंड द्यावे लागते आहे. संपूर्ण कुटुंबाची जबाबदारी एकाच माणसावर असल्यावर त्याने करावे तरी काय असा प्रश्न एसटी कामगारांना पडला आहे. परजिल्ह्यातून येऊन दुसऱ्या जिल्ह्यात काम करणाऱ्या कर्मचाऱ्यांना घर भाडे व इतर खर्च करताना नाकी नऊ येत असल्याचे एस. आर. खूपसे या कर्मचाऱ्यांनी सांगितले. खूपसे हे कणकवली एसटी वर्कशॉपमध्ये मेकॅनिक म्हणून कार्यरत आहेत.

सफाई कामगाराची काय आहे व्यथा...
दिवाळी तोंडावर आली असताना आम्हाला पगार नाही. घर कसे चालवायचे हा प्रश्न आहे. मुलांची, कुटुंबाची जबाबदारी माझ्या एकट्यावर आहे. अशी आपली व्यथा अक्काताई केरबा पाटील यांनी बोलून दाखवली. त्या कणकवली एसटी डेपोत सफाईचे काम करतात.

कर्मचारी काय म्हणाले...

अविनाश चंद्रकांत दळवी हे कर्मचारी म्हणाले शासनाने इतर कर्मचाऱ्यांना घरी बसून पगार दिला आहे. शिक्षकांसारखे कर्मचारी घरी असताना त्यांना शासन पगार देत आहे आणि अत्यावश्यक सेवेतील आमच्या कर्मचाऱ्यांवर अन्याय करत आहे. त्यामुळे शासनाने हा दुजाभाव सोडावा आणि आमच्या हक्काचा पगार शासनाने द्यावा, अशी मागणी त्यांनी यावेळी केली. हे आत्मक्लेश आंदोलन केल्यानंतर तरी आपला पगार मिळावा अशी अपेक्षा हे कर्मचारी करत आहेत आणि आपला पगार न मिळाल्यास यापेक्षा तीव्र आंदोलन करण्याचे संकेतही एसटी कर्मचाऱ्यांनी दिले आहेत.