सिंधुदुर्ग - सिंधुदुर्गातील वेंगुर्ले-रेडी बंदरात लोह-खनिज नेण्यासाठी चीन येथून 'नाथन ब्रॅन्डॉन' हे 55 हजार मेट्रीक टन क्षमतेचे सिंगापूरचे जहाज रेडी बंदरात दाखल झाले आहे. त्यामुळे चीनमध्ये उद्भवलेल्या कोरोना या विषाणूजन्य आजाराबाबत सिंधुदुर्ग जिल्ह्याची आरोग्य यंत्रणा सतर्क झाली आहे. या आजाराचा प्रादुर्भाव जिल्ह्यात होवू नये, यासाठी खबरदारी घेण्यात येत आहे.
चीनमध्ये थैमान घालत असलेल्या कोरोना विषाणूचा भारतात प्रसार होऊ नये, यासाठी चीनहून येणाऱ्या सर्व परदेशी नागरिकांचे व्हिसा रद्द करण्यात आले आहेत, अशी माहिती केंद्र सरकारने शुक्रवारी राज्यसभेत दिली. देशाबाहेरून आलेल्या १५० प्रवाशांना कोरोनाची लागण झाल्याचा संशय आल्याने त्यांना विलगीकरण कक्षात पाठवण्यात आल्याच्या पार्श्वभूमीवर भारताने कोरोना रोखण्यासाठी उपाय कडक केले आहेत.
हेही वाचा - सिंधुदुर्ग जिल्हा परिषदेच्या 'उत्कर्षा'ची लिम्का बुक ऑफ रेकॉर्डने घेतली दखल
त्यामुळे या आजाराने जनतेने घाबरून न जाता जिल्हा प्रशासनाला सहकार्य करावे, असे आवाहन जिल्हा शल्य चिकित्सक डॉ. धनंजय चाकुरकर यांनी केले आहे. सध्या तरी कोरोना विषाणूची लागण जिल्ह्यात झालेली नाही. परंतु, हा संसर्गजन्य आजार असल्याने अन्य राज्यात प्रवास करणाऱ्यांकडून हा आजार जिल्ह्यात येण्याची शक्यता नाकारता येत नाही. त्यामुळे या आजारावर जिल्ह्यात जनजागृती व्हावी, यासाठी जिल्ह्याची आरोग्य यंत्रणेने खबरदारीच्या उपाययोजना आखल्या आहेत. सर्दी, खोकला, श्वसनाचे आजार, प्रतिकारशक्ती कमी आदी लक्षणे दिसून आल्यास रुग्णांनी सरकारी रुग्णालयात उपचार घ्यावेत, असे आवाहन चाकुरकर यांनी केले आहे.
हेही वाचा - सावंतवाडीत सीएएच्या समर्थनार्थ मोर्चा
