गोव्यात लवकरच आंतरराष्ट्रीय पर्यटन सुरू होणार

गोव्यात लवकरच आंतरराष्ट्रीय पर्यटन सुरू होणार आहे. याबाबत केंद्र सरकारची लवकरच परवानगी मिळणार आहे. त्यासाठी ३१ ऑक्टोबरपर्यंत राज्यातील नागरिकांचे दोन्ही डोसचे १०० टक्के कोविड लसीकरणचे पूर्ण करणे हे उद्दिष्ट आहे, असे गोव्याचे मुख्यमंत्री डॉ. प्रमोद सावंत यांनी सांगितले. ते सोमवारी जागतिक पर्यटन दिनाच्या निमित्ताने आयोजित कार्यक्रमात बोलत होते.

पणजी : राज्यात मागच्या काही महिन्यांपासून बंद असलेले पर्यटन हळूहळू सुरू होत आहे. सरकारने मागील आठवड्यात कॅसिनो सुरू करण्याची परवानगी दिली आहे. त्यामुळे गोवा राज्यात पुन्हा एकदा पर्यटकांची गर्दी वाढू लागली आहे. राष्ट्रीय पर्यटन सुरू झाल्यानंतर राज्यातील हॉटेल व पर्यटन क्षेत्राला आता वेध लागले आहे ते आंतरराष्ट्रीय पर्यटन सुरू होण्याचे. मुख्यमंत्री डॉ. प्रमोद सावंत यांनीही याबाबत अनुकूलता दर्शवत राज्यात आंतरराष्ट्रीय पर्यटन सुरू करण्यासाठी केंद्र सरकार व गृह विभागाकडे परवानगी मागितली आहे. त्यामुळे केंद्र सरकारच्या परवानगीने राज्यात लवकरच चार्टर्ड विमाने उतरून आंतरराष्ट्रीय पर्यटन सुरू होणार असल्याचे संकेत प्रमोद सावंत यांनी दिले आहेत.

पर्यटन क्षेत्रासाठी सरकारच्या अनेक सवलती

राज्यात पर्यटनाला कोविड महामारीनंतर पुन्हा एकदा उभारी देण्यासाठी सरकारने हॉटेल व्यवसायिकांना पुन्हा एकदा नव्याने हॉटेल सुरू करण्यासाठी नोंदणी व करात ५० टक्के सवलत दिली आहे. तसेच राज्यातील टुरिस्ट गाईड व स्टेक्क होल्डर यांना अनुक्रमे १ लाख व १० लाखांचे अनुदान केंद्र सरकारच्या वतीने देण्यात येणार असल्याची माहिती मुख्यमंत्र्यांनी दिली आहे.

राज्यात पॉलिटिकल टुरिझम

राज्यात आगामी ५ महिन्यात विधानसभा निवडणूक आहे. त्यामुळे अनेक पक्षांचे राष्ट्रीय नेते गोव्याच्या दौऱ्यावर येत आहेत. त्यामुळे सर्व पर्यटनासोबत राज्यात पॉलिटिकल टुरिझम सुरू झाले आहे. आपण सर्व नेत्यांचे गोव्यात स्वागत करत आहे, असा मिश्किल टोला मुख्यमंत्र्यांनी आप, काँग्रेस व तृणमूलच्या राष्ट्रीय नेत्यांना लगावला आहे.

राज्यात २० महिन्यांपासून आंतरराष्ट्रीय पर्यटन बंद

राज्यात कोविडमुळे फेब्रुवारी २०२० पासून आंतरराष्ट्रीय पर्यटन बंद झाले आहे. त्याचा फटका गोव्यातील हॉटेल्स, टॅक्सी व स्थानिक बाजारपेठांना बसला आहे. त्यामुळे राज्यातील पर्यटनाशी निगडित प्रत्येक व्यवसायिक पुन्हा एकदा आंतरराष्ट्रीय पर्यटन सुरू होण्याकडे डोळे लावून आहे.

कोविडचा फटका आंतरराष्ट्रीय पर्यटकांना

येथील स्वच्छ समुद्रकिनारे, ड्रिंक्स, डिस्को व मत्स्य संस्कृतीमुळे देशी-विदेशी पर्यटकांची पहिली पसंती म्हणजे गोवा. या पसंतीत रशियन पर्यटकांचा जास्त समावेश असतो. मात्र राज्य व देशात मार्च २०२० मध्ये कोविडमूळे झालेल्या टाळेबंदीमुळे आंतरराष्ट्रीय विमान उड्डाणे रद्द करण्यात आली. त्यामुळे अनेक रशियन व परदेशी नागरिक गोव्यात अडकून पडले आहेत. यातील काही नागरिकांचे पैशाअभावी अतोनात हालही झाले. काही नागरिकांनी इथे मिळेल ते काम स्वीकारून आपलं जीवन जगणं पसंत केले. तर काही नागरिकांनी मानसिक तणावाखाली जाऊन आत्महत्या केल्याची घटनाही राज्यात घडल्या आहेत.

हेही वाचा - Weather Update : राज्यात मंगळवारी आणि बुधवारी अतिवृष्टी; हवामान विभागाचा अंदाज