सातारा : छत्रपती शिवाजी महाराजांचे वंशज, राज्यसभेचे खासदार उदयनराजे भोसले यांच्या वाढदिवसानिमित्त गांधी मैदानावर 'जल्लोष गाण्यांचा' या रोहित राऊत लाईव्ह कॉन्सर्टमध्ये खुद्द उदयनराजेंचा शायराना अंदाज पाहायला मिळाला. वाढदिवसाचा केक कापल्यानंतर उदयनराजेंनी 'तेरे बिना जिया जाये ना' हे गाणे गात आपल्या चाहत्यांवरील प्रेम व्यक्त केले. उदयनराजेंनी गाणे गायल्याचा व्हिडिओ प्रचंड व्हायरल होत आहे.
उदयनराजेंच्या हटके अदा : उदयनराजे आपल्या चाहत्यांसाठी कधी कॉलर उडवतात, तर कधी गाणे गातात. ज्या स्पर्धेला भेट द्यायला जातील त्या स्पर्धेच्या मैदानात उतरून त्या खेळातील आपले कौशल्य दाखवून प्रेक्षकांना खूष करतात. उदयनराजे नेहमीच विविध माध्यमांतून आपल्या चाहत्यांची मने जिंकण्याचा प्रयत्न करतात. आपल्या वाढदिवसानिमित्त 'तेरे बिना जिया जाये ना' हे गाणे गात सातारकरांवरील प्रेम व्यक्त केले.
तुमच्यासाठी गाणे गायले : साताऱ्यातील गांधी मैदानावर उदयनराजेंच्या वाढदिवसानिमित्त प्रसिद्ध गायक रोहित राऊत, जुईली जोगळेकर यांच्या कार्यक्रमाचे आयोजन करण्यात आले होते. यावेळी चाहत्यांनी केलेल्या मागणीवरून त्यांनी हिंदी चित्रपटातील गाणे गायले. तुम्ही माझ्यावर प्रेम करता. म्हणून तुमच्यासाठी हे गाणे गायल्याचे उदयनराजेंनी सांगितले.
कार्यकर्त्यांनी कापला केक : उदयनराजे भोसले यांच्या वाढदिवसानिमित्त रात्री १२ वाजता कार्यकर्त्यांनी उदयनराजेंच्या वाढदिवसाचा केक कापून जल्लोष केला. त्यावेळी उदयनराजेंनी हे गाणे गायले. हा व्हिडिओ सोशल मीडीयावर व्हायरल होत आहे.
माझे गुण महाराष्ट्राला माहित : गायक रोहित राऊत याने स्टेजवरुन खाली येऊन उदयनराजेंच्या जवळ खुर्चीवर बसला. त्याने उदयनराजे यांना गाण्याचा आग्रह केला आणि उदयनराजेंनी 'तेरे बिना जिया जायेना' हे गाणे गायले. माझ्यामध्ये काय गुण आहे, ते आख्ख्या महाराष्ट्राला माहिती आहे, असे उदयनराजे भोसले म्हणाले.
माझे वय सांगितले तर याद राखा : वाढदिवसानिमित्त शरीर सौष्ठव स्पर्धेला हजेरी लावल्यानंतर उदयनराजे भोसले यांनी कॉलर उडवून समर्थकांना खूश केले होते. माझे वय मी सांगणार नाही आणि कुणी सांगायचा प्रयत्न केला तर याद राखा, अशी फटकेबाजी करत चाहत्यांना प्रेमळ तंबीही दिली होती. पोझ देण्याची मागणी चाहत्यांनी केल्यानंतर, मी जर स्पर्धेत पोज मारायला लागलो तर इथे कोण थांबणार नाही, अशी कोटी त्यांनी केली होती.
हेही वाचा - Gautami Patil Programme : लावणी स्टार गौतमी पाटीलच्या कार्यक्रमात राडा; पोलिसांनी प्रेक्षकांना चोपले
