सातारा : आज सकाळपासून प्रवास करणार्‍या नागरिकांना खंबाटकी घाटात वाहतूक कोंडीचा सामना करावा लागला. सकाळपासून घाटात वाहनांच्या लांबच लांब रांगा लागल्या आहेत. सुट्टी प्लॅन करून फिरायला जाण्यासाठी लोक मोठ्या संख्येने बाहेर पडले आहेत. त्यामुळे रस्त्यावर वाहनांची संख्या वाढली आहे. त्यामुळे वाहतूकीची कोंडी होऊन खंबाटकी घाटातील वाहतूक संथ झाली आहे.
खंबाटकी घाटात वाहतूकीची कोंडी : शनिवार, रविवार आणि नंतर स्वातंत्र्य दिन, पारशी दिन, अशा सलग सुट्ट्यांमुळे फिरायला जाण्यासाठी लोक घराबाहेब पडले आहेत. त्यामुळे महामार्गावर वाहनांची संख्या वाढली आहे. पुणे-सातारा मार्गावरील वाहतूक सकाळपासून संथ गतीने सुरू आहे. वाहतुकीच्या कोंडीमुळे वाहनांच्या रांगा लागल्याचेही चित्र आहे. वाहनांचा वेग मंदावल्याने घाटातून वर येण्यासाठी खूप वेळ लागत आहे.
पर्यटनस्थळे पुन्हा गजबजली : जुलै महिन्यात अतिवृष्टीमुळे सातारा जिल्ह्यातील प्रसिध्द पर्यटनस्थळांकडे जाणार्‍या मार्गांवर दरडी कोसळत होत्या. त्यामुळे प्रशासनाने महाबळेश्वर, कास, वाई, पाचगणी, कोयनानगर या भागातील पर्यटनस्थळी जाण्यास पर्यटकांना मनाई केली होती. त्याचा मोठा परिणाम पर्यटनावर झाला होता. आता पावसाने विश्रांती घेतली आहे. तसेच दरडींचा धोकाही टळला आहे. त्यामुळे पर्यटनस्थळे पुन्हा गजबजू लागली आहेत. सलग आलेल्या सुट्ट्यांमुळे फिरायला जाण्याचा प्लॅन करून लोक मोठ्या संख्येने बाहेर पडले आहेत.
पुणे-सातारा प्रवासाला विलंब : रस्त्यावर वाढलेली वाहनांची संख्या आणि वाहतूक कोंडीमुळे पुढील चार दिवस पुणे-सातारा मार्गावर वाहतुकीची गती संथ राहणार आहे. अवजड वाहतुकीबरोबरच हलकी वाहने मोठ्या संख्येने रस्त्यावर आल्यामुळे वाहतुकीचा वेग मंदावला आहे. सलग सुट्ट्यांमुळे पुणे-सातारा मार्गावर ही परिस्थिती कायम राहणार आहे. त्यामुळे सातारा ते पुणे या प्रवासाला विलंब होणार आहे. खंबाटकी घाटात वाहतूक कोंडी होत असल्याने वाहन चालकांना मोठा त्राास होत आहे. याठिकाणी पोलीस नसल्यामुळे चालक आपली वाहने दामटत आहेत. त्यामुळेही कोंडीत भर पडत आहे.
मालट्रक बंद पडल्याने वाहतूक कोंडीला सुरूवात : खंबाटकी घाटाच्या सुरूवातीलाच सकाळी मालट्रक बंद पडला होता. त्यामुळे वाहनांची गर्दी होऊन वाहतूकीची कोंडी झाली होती. तासाभरानंतर मालट्रक रस्त्यातून बाजूला काढण्यात आला. तरीही वाहतुकीची कोंडी फुटली नाही. घाटातील दत्त मंंदिरापर्यंत वाहनांची गती संथ आहे. तसेच घाटाच्या पाचव्या वळणापर्यंत वाहनांची संख्या मोठी असल्याने त्याचा परिणाम वाहनांच्या गतीवर झाला आहे.
हेही वाचा -
