सातारा - थंड हवेचे पर्यटन स्थळ म्हणून प्रसिद्ध असणाऱ्या पाचगणी गिरिस्थानला आतापर्यंत पर्यटनस्थळाच्या वर्गवारी स्थान मिळाले नव्हते. आजच राज्य शासनाने ब वर्ग पर्यटनस्थळ म्हणून मान्यता दिल्याने पाचगणीच्या पर्यटन विकासाला चालना मिळणार आहे. यासाठी नगराध्यक्ष लक्ष्मी कराडकर व तत्कालीन मुख्याधिकारी अमिता दगडे यांनी विशेष प्रयत्न केले होते.
माहिती देताना नगरपालिकेचे मुख्याधिकारी पाचगणी गिरिस्थान हे प्रसिध्द पर्यटनस्थळ समुद्र सपाटीपासून सुमारे 4 हजार 308 फुट उंचावर आहे. या ठिकाणी आशिया खंडातील दुसरे महत्वाचे उंचावरचे अंदाजे 100 एकरमध्ये असलेले टेबललँड हे पठार आहे. टेबललँड जवळ कोरीव लेण्या आहेत. पाचगणी परिसरात भौगोलिक दृष्ट्या उंचावरील कृष्णा, वेण्णा नदीचे खोरे, धरण परिसर आणि निसर्ग सौंदर्य दिसणारे पारशी पॉईंट, सिडने पॉईंट, स्वच्छ भारत पॉईंट, हरिसन फॉली इत्यादी ठिकाणे आहेत. या शहराचे तापमान प्रखर उन्हाळ्यामध्येही 25 से 30 अंश सेल्सिअस पेक्षा जास्त नसते.ब्रिटिशांनी निर्माण केलेले थंड हवेचे पर्यटनस्थळ म्हणून महाबळेश्वर-पाचगणीची ओळख आहे. विविध पॉईंटची नावे ऐकल्यास इंग्रजी अधिकार्‍यांची आठवण होते. इंग्रज अधिकाऱ्यांच्या महाबळेश्वर प्रेमापोटी येथे बाजारपेठ वसवली गेली होती. त्याचबरोबर राष्ट्रपिता महात्मा गांधी यांची पावलेही पाचगणीला लागली होती. दरवर्षी 17 ते 18 लाख पर्यटकांची रिघ महाबळेश्वर-पाचगणी शहराकडे लागते. सुमारे 5 हजारांहून विदेशी नागरिक येथे पर्यटनाचा आनंद घेतात. मात्र, या शहरांना पर्यटन स्थळ वर्गवारीमध्ये स्थान आजपर्यंत कधीच मिळाले नव्हते. जिल्हाधिकाऱ्यांच्या ऑगस्ट 2019 च्या पत्रान्वयेपाचगणी गिरिस्थान नगरपालिका क्षेत्रास 'ब' वर्ग पर्यटनस्थळाचा दर्जा देण्याची शिफारस केली होती. गेल्याच महिन्यात महाबळेश्वरला हा दर्जा मिळाला आहे. या दर्जामुळे शासनाच्या विविध योजनातून पर्यटन स्थळाच्या विकासाला मोठ्याप्रमाणात निधी उपलब्ध होईल. त्यातून विकासाची अधिक दर्जेदार कामे करता येतील, असा विश्वास पाचगणीचे मुख्याधिकारी गिरीश दाबकेकर यांनी व्यक्त केला.
दरम्यान, मुख्यमंत्री उद्धव ठाकरे, पर्यटन व पर्यावरण मंत्री आदित्य ठाकरे हे फेब्रुवारी महिन्यात कुटुंबियांसमवेत महाबळेश्वर येथे खासगी दौऱ्यानिमित्त आले होते. त्यांनी पाचगणीच्या पर्यटन स्थळाची देशात वेगळी ओळख हवी, असे सांगत शहराच्या सर्वांगीण विकासाच्या संदर्भात पर्यावरणाला धक्का न लावता पर्यटन वाढीसाठी प्रयत्न करणे गरजेचे आहे, असे मत व्यक्त केले होते. त्यानुसार या पर्यटनस्थळी पर्यटन क्षमता विचारात घेता एक विशेष बाब म्हणून पाचगणी नगरपालिका क्षेत्रात ब वर्ग पर्यटन स्थळ म्हणून घोषित करण्यास सरकारने मान्यता दिली आहे. त्यामुळे महाबळेश्वर व पाचगणीचे पर्यटनदृष्ट्या महत्व अधोरेखित झाले आहे.
हेही वाचा - खासदार उदयनराजे अवमान प्रकरण : प्रकाश आंबेडकर यांच्याविरुद्ध गुन्हा दाखल
