दुष्काळग्रस्त खटाव आणि माण तालुक्यात दोन कोरोनाबाधित रुग्ण; परिसरात चिंतेचे वातावरण

मागील दीड महिन्यांपासून कोरोनामुक्त असलेल्या खटाव आणि माण तालुक्यात कोरोनाचा शिरकाव झाल्याने दोन्ही तालुक्यातील नागरिकांच्या चिंतेत भर पडली आहे.

सातारा - सततच्या दुष्काळाने हैराण असलेल्या खटाव आणि माण तालुक्यातील नागरिकांना आता कोरोनाने देखील चिंतेत टाकले आहे. मंगळवारी या दोन्ही तालुक्यात मिळून दोन कोरोनाबाधित रुग्ण आढळून आले आहेत. दीड महिन्यात एकही कोरोना रुग्ण नसणाऱ्या या तालुक्यात बाहेरुन प्रवास करून आलेल्या नागरिकांना कोरोनाची बाधा झाल्याने, परिसरात चिंतेचे वातावरण आहे.

ठाणे येथील एक कुटुंब सहा मे रोजी दुचाकीवरून जिल्हा बंदीचे उल्लंघन करून खरशिंगे येथे आले होते. त्यानंतर त्यांच्यावर औंध पोलीस स्टेशनमध्ये गुन्हा दाखल करण्यात आला होता. त्यानंतर या सर्वांना गावाजवळ होम क्वारंटाईनमध्ये करण्यात आले होते. मात्र, दहा मे रोजी संबंधित कुटुंबातील एका व्यक्तीला खुपच त्रास जाणवू लागल्याने सर्वांचे स्व‌ॅब नमुने घेण्यात आले. सोमवारी रात्री उशिरा याबाबत तपासणी अहवाल आला. यात संबंधित त्रास होत असलेल्या व्यक्तीचा पहिला कोरोना चाचणी रिपोर्ट निगेटीव्ह आला आहे. मात्र, त्यांच्या 21 वर्षीय मुलाचा अहवाल पॉझिटिव्ह आला आहे.

हेही वाचा... नर्सेसला सलाम..! कोरोनाविरोधाच्या युद्धातील 'फ्रंट वॉरियर'

माण तालुक्यातील 6 नागरिकांनी सांगली जिल्ह्यातील एका कोरोनाबाधित व्यक्ती सोबत प्रवास केला होता. ती व्यक्ती कोरोना पॉझिटिव्ह निघाल्यानंतर तालुक्यातील या सहाही नागरिकांना प्रशासनाने क्वारंटाईन केले होते. त्यामधील एकाचा अहवाल कोरोना पॉझिटिव्ह आला आहे. त्यामुळे माण तालुक्यात देखील आता कोरोनाचा एक रुग्ण झाला आहे आहे.

मागील दीड महिन्यांपासून कोरोनामुक्त असलेल्या खटाव आणि माण तालुक्यात कोरोनाचा शिरकाव झाल्याने दोन्ही तालुक्यातील नागरिकांच्या चिंतेत भर पडली आहे. प्रांताधिकारी अश्विनी जिरंगे, तहसीलदार डॉ. अर्चना पाटील, तहसीलदार माने यांनी संबंधित विभागांना योग्य त्या सूचना देऊन खबरदारी घेण्याचे आदेश दिले आहेत.