सातारा - "मी ओरिजनल नाईक-निंबाळकर आहे. माझा डीएनए तपासाल तर हा रणजित ९६ पिढ्यांपासून नाईक निंबाळकर असल्याचे पाहायला मिळेल". परंतु तुमचं काय तुम्ही स्वतःला नाईक-निंबाळकर म्हणता आणि मी नाईक-निंबाळकर नाही म्हणून सांगाता. मात्र, तुमच्या आईचे आणि वडिलांचे लग्न झाले असेल तर त्या लग्नाचा दाखला मला दाखवा. आणि जो कोणी मला दाखला देईल त्याला मी एक हजाराचे बक्षीस देईन. कारण, रामराजे हे बिन लग्नाची अवलाद आहेत आणि हा इतिहास आहे, असा घणाघाती आरोप माढा मतदारसंघाचे नवनिर्वाचित खासदार रणजितसिंह नाईक निंबाळकर यांनी विधान परिषदेचे सभापती रामराजे नाईक निंबाळकर यांच्यावर केला आहे. लोकसभा निवडणुकीतील विजयानंतर फलटनमध्ये आयोजित सभेत बोलताना निंबाळकर यांनी हा जिव्हारी लागणारा घणाघात केला आहे.
रामराजेंचे वडील मालोजीराजांनी त्यांना घरात घेतले नव्हते. मला त्यांच्याविषयी वाईट बोलयाचे नव्हते, परंतु बोलण्याची वेळ आली असल्याचे ते म्हणाले. तसेच फलटण तालुक्यात आता नवीन जीआर आलेला आहे. त्या जीआरनुसार इथे केलेली पापं इथेच फेडायची आहेत. त्यामुळे रामराजे यांनी केलेल्या पापांची फळं आणि शिक्षा ठरलेली आहे, असा निशाणाही त्यांनी रामराजेंवर साधला.
माढा लोकसभा मतदारसंघाचे भाजप-शिवसेनेचे खासदार रणजितसिंह नाईक निंबाळकर हे पाऊण लाखाच्या मताधिक्क्याने विजयी झाले त्यानंतर शुक्रवारी त्यांची फलटण येथे जाहीर सत्कार सभा आयोजित करण्यात आली होती. या सभेसाठी राज्याचे महसूल मंत्री चंद्रकांत पाटील, करमाळ्याचे आमदार नारायण पाटील, माजी खासदार हिंदुराव नाईक निंबाळकर, फलटण नगर परिषदेचे विरोधी पक्षनेते राम नाईक निंबाळकर, भाजपचे सातारा जिल्हाध्यक्ष विक्रम पावस्कर, सातारा जिल्हा भाजपचे उपाध्यक्ष अनिल देसाई उपस्थित होते.
प्रशासनाने कामं नाही केल्यास पायतानाने हाणा; अधिकाऱ्यांनाही तंबी
खासदार निंबाळकर म्हणाले, सुमारे २३ वर्षानंतर फलटणला खासदारकी मिळाली आहे. माझ्या कार्यकर्त्यांचा अंगावर २३ वर्षानंतर गुलाल लागला आहे. कार्यकर्त्यांची कामे करण्यासाठी मी कटिबद्ध आहे. फलटण तालुक्यातील तलाठी, पोलीस, तहसीलदार, प्रांत यांनी जर काम करण्यासाठी पैसे मागितले तर पायातलं काढून सरळ हाणायचे. नाईक-निंबाळकर तुमच्या केसालाही धक्का लागू देणार नाही, असे आवाहन कार्यकर्त्यांना करत प्रशासकीय अधिकाऱ्यांना सुचक इशारा दिला.
तालुक्यात भ्रष्टाचार केला त्याला तालुक्यातील अधिकाऱ्यांनी पाठबळ दिले. त्यामुळे अधिकाऱ्यांना इथून पुढे तालुक्यात भ्रष्टाचार चालणार नाही. जमत नसेल तर बदल्या करून घ्या. यापुढे एकही तक्रार चालणार नाही. जो अधिकारी तालुक्यातील जनतेसाठी काम करेल शेतकऱ्यांसाठी काम करेल त्याचा निश्चित सन्मान केला जाईल. कार्यकर्त्यांनो उतू नका, मातू नका घेतला वसा टाकू नका. अधिकाऱ्यांना अरेरावीची भाषा करू नका. विरोधी पक्षातील कार्यकर्त्यांचा सन्मान करा. त्यांच्या घरासमोर गुलाल टाकू नका. तोही तुमच्या सारख्या सामान्य कार्यकर्ता आहे, असल्याचे सांगत त्यांनी कार्यकर्त्यांनाही मिळालेला विजय सन्मानाने साजरा करण्याचे आवाहन केले.
