सातारा - वाढे फाट्याजवळ महामार्गाच्या सेवा रस्त्याजवळ थांबलेल्या माल वाहतूक करणाऱ्या वाहन चालकास चाकूचा धाक दाखवून मारहाण करुन तीन हजारांची रोकड व मोबाईल तिघांनी लुटून नेला. या प्रकरणी सातारा तालुका पोलिसांनी काही तासातच या गुन्ह्यातील दोघांना अटक केली तर एका अल्पवयीन मुलाला ताब्यात घेतले.
अधिक अंकुश पवार (वय 27 वर्षे), सुयश अशोक जाधव (वय 19 वर्षे, दोघेही रा. सैदापूर, ता. सातारा) अशी घटक केलेल्या संशयितांची नावे आहेत तर एका अल्पवयीन मुलाला पोलिसांनी ताब्यात घेतले आहे.
मोटारसायकलवरुन आलेल्या तिघांनी लुटले
याबाबत सविस्तर वृत्त असे, मंगळवारी (दि. 24 नोव्हेंबर) रात्री पुणे-बंगळुरू महामार्गावर वाढे (ता. सातारा) गावच्या हद्दीत सेवा रस्त्यावर एक वाहन थांबलेले होते. मोटारसायकलवरून आलेल्या तीन अनोळखी युवकांनी वाहन चालकास चाकूचा धाक दाखवून मारहाण केली. तसेच तीन हजारांची रोकड व मोबाईल हिसकावून पोबारा केला.
संशयितांकडून गुन्ह्याची कबुली
वाहन चालक अविनाश किसन शेळके (रा. बिरोबावस्ती, लोणंद) यांनी सातारा तालुका पोलिसांना झालेला प्रकार सांगितला. पोलिसांनी कौशल्याने तपास करुन एका संशयितास ताब्यात घेतले. त्याने दोन साथीदारांबरोबर हा गुन्हा केल्याची कबुली दिली. पोलिसांनी इतर दोघांनाही ताब्यात घेतले. गुन्ह्यातील लुटलेली रोकड, वापरलेले शस्त्र व मोटारसायकल पोलिसांनी जप्त केली आहे.
हेही वाचा - केसे-वारूंजी गावातील शंभर एकर ऊस आगीत जळून खाक; कोट्यवधींचे नुकसान
