सातारा - आमदार नितेश राणे त्यांच्या वक्तव्यामुळे नेहमी चर्चेत राहतात. पाटणमधील हिंदु आक्रोश मोर्चानंतर साताऱ्यात झालेल्या पत्रकार परिषदेत त्यांनी माजी मंत्री आदित्य ठाकरे (Aaditya Thackeray) व आमदार रोहित पवार यांच्यावर टीका केली आहे. शक्ती कायदा वेळीच (Shakti Law) आणला असता तर महाविकास आघाडी (Mahavikas Aghadi) सरकारमधील दोन ते तीन मंत्री जेलमध्ये गेले असते. अगदी आदित्य ठाकरेसुद्धा आत गेले असते, अशी टीका आमदार नितेश राणे (Mla Nitesh Rane) यांनी केली.
रोहित पवारांचे निवडून यायचे वांदे - लव जिहाद आणि धर्मांतर कायद्यावर सगळेच बोलता बोलत आहेत. मात्र, शक्ती कायद्यावर कोणी बोलत नसल्याचा आरोप राष्ट्रवादीचे आमदार रोहित पवार यांनी कोल्हापुरात केला होता. त्याला उत्तर देताना नितेश राणे म्हणाले, रोहित पवारांनी सगळीकडे तोंड खूपसण्यापेक्षा कर्जत-जामखेडकडे बघावे. तुमच्या मतदारसंघाची अवस्था पहा. २०२४ ला निवडून यायचे तुमचे वांदे आहेत. रोहित पवार हा वेगळ्या प्रकारचा पवार दिसतोय तो सगळीकडे तोंड घालतो, असा टोलाही त्यांनी लगावला. पाटणमधील हिंदु आक्रोश मोर्चानंतर साताऱ्यात झालेल्या पत्रकार परिषदेत ते बोलत होते.
दोन-तीन माजी मंत्र्यांना आधी जेलमध्ये टाकू - रोहित पवार हे पहिल्यांदाच आमदार झाले आहेत. त्यांनी पवार साहेबांकडून काहीतरी शिकावे. पवार साहेब कसं मोजकेच बोलतात आणि करायचं तेच करतात. हा पवार मात्र वेगळ्या प्रकारचा दिसतोय. तो सगळीकडे तोंड घालतो. आमचे सरकार शक्ती कायदा सक्षम करून त्याची अंमलबजावणी करेल. त्यानंतर महाविकास आघाडीच्या दोन-तीन माजी मंत्र्यांना आधी जेलमध्ये टाकू. ते आमच्या रेंजमध्ये आहेत. हे त्यांनी लक्षात ठेवावे, असा इशारा नितेश राणेंनी दिला.
हिंदु विरोधी अधिकाऱ्यांचा कार्यक्रम करणार - सातारा , पाचगणी , महाबळेश्वर आणि फलटण येथील पोलीस निरीक्षक हे हिंदू विरोधी आहेत. त्यांच्या संदर्भातील तक्रार आम्ही गृहमंत्र्यांच्या कानावर घालून चारही पोलीस अधिकाऱ्यांचा करेक्ट कार्यक्रम करणार असल्याचे नितेश राणे यांनी नाव घेऊन सांगितले.
