सातारा- म्हसवड शहराच्या मध्यवर्ती भागात राहणारा ५८ वर्षीय पुरुष कोरोना पॉझिटिव्ह आढळला आहे.यामुळे शहरात भीतीचे वातावरण निर्माण झाले आहे. शहरात कोरोनाचा शिरकाव झाल्याचे शनिवारी रात्री स्पष्ट झाले. प्रशासनाच्यावतीने या भागात कंटेनमेंट झोन जाहीर करण्यात आला आहे. कंटेंनमेंट झोनमध्ये अत्यावश्यक सेवा वगळता इतर सेवा बंद राहणार आहेत. १४ दिवसांसाठी शहरातील मुख्य भागाचा परिसर लाॅकडाऊन करून सील करण्यात आला आहे.
५८ वर्षीय पुरुष मागील काही दिवसांपूर्वी बारामती तालुक्यातील एका गावात धार्मिक कार्यक्रमाचे निमंत्रण देण्यासाठी गेला होता. त्याच्यासोबत नऊ जणांनी एकत्रित प्रवास केल्याचे समजते. तेथून आल्यावर ५८ वर्षीय पुरुषास त्रास जाणवू लागला त्यानंतर त्याने काही दिवस घरीच उपचार घेतले. मात्र, त्रास वाढू लागल्यावर एका खाजगी रुग्णालयात दाखवल्यानंतर डॉक्टरांच्या सल्ल्याने पुढील उपचार घेण्यासाठी कराडला दाखल करण्यात आले. त्यानंतर त्याचा स्वॅब घेतल्यानंतर शनिवारी रात्री तो कोरोना पॉझिटिव्ह असल्याचा रिपोर्ट आला. यामुळे शहरात खळबळ माजली आहे.
पॉझिटिव्ह रुग्णाच्या संपर्कात आलेले घरातील सदस्य, वाहनाचा चालक, घरकाम करणारी महिला व बाहेरगावी एकत्रित प्रवास केलेले नऊ जण या सर्व जणांची तपासणी करावी लागणार आहे. त्यानंतर ही साखळी कुठपर्यंत जाते हे रिपोर्ट आल्यानंतर स्पष्ट होणार आहे.त्यामुळे शहरात भीतीचे वातावरण निर्माण झाले आहे.
दरम्यान, तहसीलदार बी. एस. माने,सहायक पोलीस निरीक्षक गणेश वाघमोडे, तालुका वैद्यकीय अधिकारी डॉ. लक्ष्मण कोडलकर, वैद्यकीय अधिकारी, कर्मचारी, तलाठी यू. एन. आकडमल, पालिकेच्या कर्मचाऱ्यांनी भेट देऊन परिसराची पाहणी केली व सतर्कतेच्या सूचना दिल्या असून करोनाची साखळी तोडण्यासाठी कंटेनमेंट झोन जाहीर करत शहरातील मुख्य भाग सील करण्यात आला आहे. तसेच शहरात येणारे मुख्य रस्ते बंद करण्यात आले आहेत.
