सातारा - कास यवतेश्वर रस्त्यावर, गणेश खिंडीत साताऱ्याकडे येणारी कार २०० फूट दरीत कोसळली. या भीषण अपघातात २५ वर्षीय युवती जागीच ठार झाली. अन्य एक युवक व युवती गंभीर जखमी झाले आहेत.
कोमल बापूराव पाटील (वय २५, रा. बोरखळ, ता. सातारा) असे ठार झालेल्या युवतीचे नाव आहे. प्राजक्ता दिलीप साबळे (वय २४) व अमर दीपक शिर्के (वय २४, दोघेही रा. मार्केट यार्डपरिसर सातारा) अशी जखमींची नावे आहेत.
गाडीवरील नियंत्रण सुटल्याने अपघात -
हे तिघेही कारने फिरण्यासाठी कास पठारावर गेले होते. साताऱ्याकडे येताना गणेश खिंडीत अमरचे गाडीवरील नियंत्रण सुटले. त्यामुळे कार परळीबाजूला दोनशे फूट दरीत कोसळली. कार कोसळत असतानाच कार चालवणारा अमर व पाठीमागे बसलेली प्राजक्ता कारमधून बाहेर फेकले गेले. अमर जखमी अवस्थेत दरीतून वर आला. त्यामुळे दोघांचेही प्राण वाचले. मात्र या अपघातात त्यांना गंभीर दुखापत झाली.
ट्रेकर्सच्या मदतीने कोमल पाटील हिचा मृतदेह दरीतून वर काढण्यात आला. दोन्ही जखमींवर खासगी रुग्णालयात उपचार सुरू आहेत.
