सातारा - शेअर्समध्ये घोटाळा करुन वृद्धाची तब्बल 70 लाखांची फसवणूक करण्यात आल्याचा धक्कादायक प्रकार समोर आला आहे. दत्ता शामराव नरगुंदे (वय ७०, रा. यादोगोपाळ पेठ) असे फसवणूक झालेल्या व्यक्तीचे नाव आहे.
आरोपीने डिमॅट अकाऊंट धारकाच्या बनावट सह्या केल्या. शेअर अकाऊंटशी संलग्न मोबाईल क्रमांक परस्पर बदलून सात हजार शेअरची अफरातफर केली. याप्रकारे त्याने नरगुंदे यांची तब्बल 70 लाख रुपयांची फसवणूक केली. याप्रकरणी डीमॅट अकाऊंटचे व्यवहार पाहणारा रोहित शिवाजी शेळके (रा. शेळकेवाडी, ता. सातारा), आयडीबीआय बँकेतील शाखा व्यवस्थापक, डिमॅट खात्याचे व्यवहार पाहणारे आणि सहीची शहानिशा करण्याचे अधिकार असलेल्या सर्व कर्मचाऱ्यांविरूद्ध शाहूपुरी पोलीस ठाण्यात गुन्हा दाखल झाला आहे. याबाबत दत्ता शामराव नरगुंदे (वय ७०, रा. यादोगोपाळ पेठ) यांनी तक्रार दिली आहे.
तक्रारदार दत्ता नरगुंदे यांनी १९८० पासून शेअर खरेदी करण्यास सुरुवात केली. ही खरेदी आणि विक्री ते ब्रोकरमार्फत करत होते. सुरुवातीला त्यांचे आणि पत्नीचे अशी दोघांची संयुक्त खाती होती. मात्र, पत्नीचे निधन झाल्यानंतर त्यांनी २०१५ साली संयुक्त खाते बंद केले आणि स्वत:च्या खात्यावरून खरेदी सुरू केली. त्यांनी महाराष्ट्र स्कुटर, एशियन पेंट्स, ब्ल्यूस्टार, सिप्ला, ग्रासीम, अल्ट्राटेक अशा विविध कंपन्यांचे शेअर्स खरेदी केले होते.
हेही वाचा - आता खासगी डॉक्टरांच्या प्रिस्क्रिप्शनवरही करता येणार कोरोना चाचणी; आरोग्य मंत्रालयाचा निर्णय
जून २०१८ मध्ये एनएसडीएलकडून आलेल्या स्टेटमेंटची पाहणी केल्यावर महाराष्ट्र स्कूटर कंपनीचे ८० शेअर्स कमी झाल्याचे त्यांच्या निदर्शनास आले. त्यामुळे त्यांनी आयडीबीआय बँकेत जाऊन डीमॅट अकाऊंटचे व्यवहार पाहणारे शेळके तसेच शाखा व्यवस्थापकांची भेट घेतली. यावेळी त्यांनी याची चौकशी करतो, असे सांगितले. विविध कंपनीचे एकुण सात हजार शेअर्स कमी झाले असल्याचे नरुगुंदे यांच्या निदर्शनास आले. त्यानंतरही ते शेळके आणि शाखा व्यवस्थापकाला भेटले असता व्यवहार न करता शेअर्सची विक्री कशी झाली? याबाबत नरगुंदे यांनी विचारणा केली. यावेळी त्यांना प्रिंटींग मिस्टेक असेल, बँकेचे व्हर्जन बदलले आहे, थोडे थांबा, आम्ही चौकशी करतो, अशी कारणे सांगण्यात आली.
यानंतर फेब्रुवारी महिन्यात शेळके त्यांच्या घरी गेला होता. शेअर्सची विक्री मीच केली आहे. यात अफरातफरही मीच केली आहे. शेअर्सच्या अफरातफरीबाबत कुठेही तक्रार करू नका, आपले पैसे मी सवडीने परत करीन, असे त्याने सांगितले. मात्र, लेखी मागितल्यावर तसे दिले नाही. तसेच पैसेही दिले नाहीत. त्यामुळे नरगुंदे यांनी शाहूपुरी पोलीस ठाण्यात धाव घेऊन शेळके, बँक व्यवस्थापक आणि डिमॅट अकाऊंटशी संबंधित व्यवहार पाहणाऱया सर्वांविरूद्ध तक्रार दिली.
