सातारा - पुणे-बंगळुरू राष्ट्रीय महामार्गावर डी- मार्ट जवळ खासगी बस व ट्रकचा अपघात झाल्याची घटना घडली आहे. यामध्ये 5 जणांचा मृत्यू झाला आहे. तर 20 हून अधिक प्रवासी जखमी झाले आहेत. या ठिकाणी पोलीस प्रशासन दाखल झाले असून जखमींना जिल्हा ग्रामीण रुग्णालयात दाखल करण्यात आले आहे.
हेही वाचा - साताऱ्यातील नरवणे गावात १६४ वर्षांपासुन 'एक गाव एक गणपती' परंपरा
याबाबत सविस्तर माहिती अशी की, पुणे-बंगळुरू महामार्गावरून कोल्हापूरकडे मालवाहतूक करणारा ट्रक जात होता. यावेळी सातारा शहराजवळच्या डी-मार्ट समोर ट्रकचे टायर फुटले. ट्रकचालकाने ट्रकवर निंयत्रण मिळवत ट्रक जागीच थांबवला. त्याचवेळी पुणेच्या दिशेकडून बेळगावकडे निघालेल्या (केए-01-एएफ-9506) या एस.आर.एस कंपनीच्या ट्रॅव्हल्सने (एमएच-43-बीपी-3127) या ट्रकला पाठीमागून जोरदार धडक दिली. ही धडक एवढी जोरदार होती की, ट्रॅव्हलच्या पुढच्या भागाचा अक्षरशः चक्काचूर झाला.
हेही वाचा - गणेश विसर्जन करण्यासाठी गेलेल्या काका-पुतण्याचा नदीत बुडून मृत्यू
या अपघातात 5 जणांचा जागीच मृत्यू झाला असून, 20 प्रवाशी जखमी झाले आहेत. अपघाताची माहिती मिळताच सातारा तालुका पोलीस ठाण्याचे पोलीस निरिक्षक हंकारे यांनी कर्मचाऱ्यांसह अपघातस्थळी धाव घेत जखमी प्रवाशांना सातारा येथील शासकीय रुग्णालयात अधिक उपचारासाठी हलवले. दरम्यान, अपघात झाल्यानंतर वाहतूक सेवा वळवण्यात आली आहे. तर अपघातात मृत्यू पावलेल्या व्यक्तींची ओळख पटवण्याचे काम सुरू आहे.
