सांगली - फुकट घ्या फुकट.. ढबू मिरची घ्या ढबु मिरची.. फुकट.. फुकट.. फुकट.. असा आवाज गेल्या दिवसांपासून कुंडल परिसरात घुमत आहे. हा कोण्या एखाद्या व्यापाऱ्याचा आवाज नाही, तर ही येथील हवालदील झालेल्या शेतकऱ्याची आर्त हाक आहे. सध्या बाजारात ढोबळी मिरचीचे(शिमला) दर पडल्याने हवालदिल झालेल्या शेतकऱ्याने चक्क ट्रॅक्टर मधून शिमला मिरची फुकट वाटल्याचा प्रकार समोर आला आहे. दर कोसळल्याने भीमराव साळुंखे या शेतकऱ्यावर ही घाम गाळून पिकवलेला माल फूकट वाटण्याची वेळ आली आहे.
सांळुखे यांच्या मिरचीला 9 रूपये किलो दर मिळायचा. त्यात 6 रुपये खर्च वजा होत 3 रुपये पर्यंत नफा मिळत. मात्र आता या शिमला मिरचीचे दर पाच रुपयांच्या खाली पोहोचलेले आहेत. त्यामुळे व्यापाऱ्यांनी साळुंखे यांना मिरची आणू नका,असा सल्ला दिला. मात्र पिकवलेल्या मिरचीचे करायचे काय? हा प्रश्न त्यांच्यापुढे उभा होता. आता शेतात तोडणीसाठी आलेली डबल मिरची करायची काय ? असा प्रश्न त्यांच्यासमोर निर्माण झाला. मिरचीचे झाड जगवायची असेल तर तोड हा केलाच पाहिजे, मात्र ही तोड केलेली ढबु मिरची बाजारात विक्रीसाठी घेऊन जायचं, तर तो खर्च परवडणारा नव्हता. त्यामुळे साळुंखे यांनी मिरची थेट फुकट वाटण्याचा निर्णय घेतला आणि आपल्या ट्रॅक्टर ट्रॉली मध्ये ढब्बू मिरची भरून गेल्या दोन दिवसांपासून गावा-गावात मोफत वाटत आहेत.
एकालाही दिसली नाही शेतकऱ्याची वेदना...
सुरुवातीला नागरिकांना ढबु मिरची विक्रीसाठी असल्याचे वाटलं, त्यामुळे कोणी फारसे फिरकले नाही. पण नंतर फुकट असल्याची हाक कानावर पडताचे नागरिकांनी ढोबळी मिरची घेण्यासाठी तोबा गर्दी केली. बघता बघता ढोबळी मिरचीचा भरलेला ट्रॅक्टर काही वेळात रिकामा झाला. पण एवढ्या मोठ्या प्रमाणात मोफत वाटप सुरू असताना एकाही नागरिकाला, त्या शेतकऱ्याची वेदना दिसून आली नाही, किंवा एकानेही पैसे देऊ का? अशी विचारणा देखील केली नसल्याचे यावेळी दिसून आले.
हेही वाचा - रक्षाबंधन : सांगलीत वृक्ष संवर्धन-संरक्षणासाठी "भगिनी रक्षणम्" कार्यक्रम
