इस्लामपूरमध्ये कोरोनाचा कहर.. मंत्री जयंत पाटील सांगलीत दाखल, प्रशासनाकडून सर्व तालुक्यांचा आढावा

इस्लामपूर शहरात कोरोनाबाधितांचा आकडा वाढत आहे. हा राज्याचे जलसंपदामंत्री जयंत पाटील यांचा मतदारसंघ आहे. इस्लामपूरमधील कोरोना रुग्णांचा आकडा वाढत चालल्याने मंत्री जयंत पाटील मुंबईतून सांगलीत दाखल झाले असून त्यांनी जिल्ह्यातील सर्व तालुक्यांचा आढावा घेतला..

सांगली - इस्लामपूर शहरातील वाढत्या कोरोना रुग्णाच्या पार्श्वभूमीवर आणि जिल्ह्यातील सर्व परिस्थितीवर लक्ष ठेवण्यासाठी इस्लामपूर मतदारसंघाचे आमदार व जिल्ह्याचे पालकमंत्री जयंत पाटील मुंबई सोडून सांगली जिल्ह्यात दाखल झाले आहेत. त्यांनी विटा येथे कोरोनाच्या पार्श्वभूमीवर जिल्ह्यातील सर्व तालुक्यांचा आढावा घेतला.

सांगलीच्या इस्लामपूर या ठिकाणी एकाच कुटुंबातील 24 जणांना कोरोनाची लागण झाली आहे. त्यामुळे देशात आणि संपूर्ण राज्यात खळबळ उडाली आहे. राज्याचे आरोग्य विभाग आणि प्रशासन चक्रावून गेले आहे. राष्ट्रवादीचे जलसंपदा मंत्री जयंत पाटील यांचा हा मतदारसंघ आहे. तर अशा या परिस्थितीवर मंत्री जयंत पाटील हे मुंबईमधून लक्ष ठेवून होते. इस्लामपूर मधील कोरोना रुग्णांची संख्या वाढत असल्याने जिल्हा प्रशासनाला सूचना देत होते. मात्र इस्लामपूर मधल्या कोरोना रुग्णांचा वाढता आकडा पाहता मंत्री जयंत पाटील हे तातडीने सांगली जिल्ह्यात शनिवारी दाखल झाले आहेत.

विटा याठिकाणी मंत्री जयंत पाटील यांनी पोहचत खानापूर, आटपाडी, कडेगाव तालुक्यातील सर्व परिस्थितीची अधिकारी, लोकप्रतिनिधीकडून माहिती घेतली. तसेच इस्लामपूरमध्ये जसे,मोठ्या प्रमाणावर रुग्ण आढळून आले तसे इतर तालुक्यात रुग्ण आढळून येऊ नयेत, यासाठी सर्व पातळ्यांवर खबरदारी घेण्याच्या सूचना दिल्या. तर इस्लामपूरमधील परिस्थितीचाही यावेळी मंत्री पाटील यांनी विशेष आढावा घेतला.