सांगली - कडकनाथ कोंबडी घोटाळाप्रकरणी मुख्यमंत्र्यांच्या महाजनादेश यात्रेमध्ये कोंबड्या सोडण्याचा इशारा विविध सामाजिक संघटनांनी दिला आहे. तर दुसरीकडे पूरग्रस्तांच्या मागण्यांसाठी शिवसेनेकडूनही महाजनादेश यात्रेला विरोध होताना दिसत आहे. 16 सप्टेंबरला मुख्यमंत्री देवेंद्र फडणवीस यांची महाजनादेश यात्रा सांगलीमध्ये येत असून या यात्रेवर आंदोलनांचे सावट निर्माण झाले आहे.
मुख्यमंत्री देवेंद्र फडणवीस यांची महाजनादेश यात्रा 16 सप्टेंबरला सांगली जिल्ह्यात येत आहे. यात्रेच्या पार्श्वभूमीवर शिवसेना आणि विविध संघटनांनी आंदोलनाचे इशारे दिले आहेत. सांगली जिल्ह्यात नुकत्याच येवून गेलेल्या महापूरात लाखो लोकांचे संसार उद्ध्वस्त झाले. सरकारकडून पूरग्रस्तांना मदत म्हणून सानुग्रह अनुदान घोषित करण्यात आले होते. यामध्ये ग्रामीण भागात 10 हजार व शहरी भागात 15 हजार अशी रक्कम निश्चित करण्यात आली होती. त्यापैकी प्रत्येकी पाच हजार रुपये रोख स्वरूपात पूरग्रस्तांना देण्यात आले. तर, उर्वरित रक्कम ही पूरग्रस्तांच्या खात्यावर जमा करण्याचे सरकारकडून जाहीर करण्यात आले होते. मात्र, अद्यापही या पूरग्रस्तांना जाहीर केलेली उर्वरित रक्कम मिळालेली नाही. त्यामुळे तातडीने पूरग्रस्तांच्या खात्यावर ही रक्कम वर्ग करण्यात यावी अशी मागणी करत 16 सप्टेंबरला मुख्यमंत्र्यांच्या सांगली शहरातील महाजनादेश यात्रे दरम्यान आंदोलन करून यात्रा रोखण्याचा इशारा शिवसेनेकडून देण्यात आला आहे.
हे ही वाचा - 'अशोका'चे झाड कुणाला सावली देत नाही, म्हणून नांदेडकरांनी नवीन झाड लावले - मुख्यमंत्री
दुसरीकडे राज्यात गाजत असलेल्या कडकनाथ कोंबडी घोटाळाप्रकरणी सांगली जिल्ह्यातल्या विविध सामाजिक संघटनांनी एकत्र येत घोटाळ्यातील आरोपी व त्यांना पाठीशी घालणाऱ्यांवर कडक कारवाई करून या प्रकरणाची ईडी मार्फत चौकशीच्या मागणीसाठी कडकनाथ कोंबडी पालक संघर्ष समितीच्या माध्यमातून मोर्चा काढण्याची परवानगी प्रशासनाकडे मागितली होती. मात्र, पोलीस प्रशासनाने मुख्यमंत्र्यांच्या महाजनादेश यात्रेचे कारण पुढे करत मोर्चाला परवानगी नाकारली आहे. यामुळे आक्रमक झालेल्या सामाजिक संघटनांच्या संघर्ष समितीने मुख्यमंत्र्यांची यात्रा ज्या रस्त्यावरून जाणार आहे त्या ठिकाणी मुख्यमंत्र्यांना निवेदन स्वीकारून कारवाईचे आश्वासन द्यावे, अशी भूमिका जाहीर करत निवेदन न स्वीकारल्यास मुख्यमंत्र्यांच्या महाजनादेश यात्रेत कोंबड्या फेकण्यात येतील. असा इशारा संघर्ष समितीच्या वतीने देण्यात आला आहे.
हे ही वाचा - जनआशिर्वाद यात्रा : आदित्य ठाकरेंचे बुलडाण्यात भावी मुख्यमंत्री म्हणून स्वागत
