सांगली - छत्रपती उदयनराजे भोसले यांच्याबद्दल शिवसेनेचे खासदार संजय राऊत यांनी केलेल्या वक्तव्याचा शिवप्रतिष्ठानकडून निषेध व्यक्त करण्यात आला आहे. या विरोधात शिवप्रतिष्ठानकडून शुक्रवारी सांगली जिल्हा बंदची हाक देण्यात आली आहे. शिवप्रतिष्ठानाचे संस्थापक संभाजी भिडे यांनी हा निर्णय घेतला. राऊत यांनी बुधवारी पुण्यातील एका कार्यक्रमामध्ये माजी खासदार उदयनराजे भोसले यांनी छत्रपती शिवाजी महाराजांचे वंशज असल्याचा पुरावा द्यावा, असे वक्तव्य केले होते.
खासदार राऊत यांनी अत्यंत निंदनीय वक्तव्य केले आहे. त्यामुळे छत्रपती उदयनराजे भोसले यांच्यासह संपूर्ण महाराष्ट्राची अस्मिता दुखावली गेली आहे. शुक्रवारी संजय राऊत यांच्या वक्तव्याचा निषेध म्हणून सांगलीमध्ये कडकडीत बंद पाळण्यात येणार आहे, असे संभाजी भिडे यांनी सांगितले.
हेही वाचा - इंदिरा गांधींबद्दल तथ्यहीन अनादर काँग्रेस खपवून घेणार नाही"
राऊतांच्या या वक्तव्याची दखल घेऊन मुख्यमंत्री उद्धव ठाकरे यांनी राऊतांकडून खासदारकीचा राजीनामा घ्यावा. अन्यथा, यापुढील काळात संपूर्ण महाराष्ट्रभर शिव प्रतिष्ठानकडून आंदोलन उभारण्यात येईल, असा इशारा भिडे यांनी दिला आहे. शुक्रवारी सांगली जिल्ह्यातील इस्लामपूर येथे मुख्यमंत्री उद्धव ठाकरे एका कार्यक्रमानिमित्त उपस्थित राहणार आहेत. या पार्श्वभूमीवर शिवप्रतिष्ठानने पुकारलेल्या या आंदोलनाकडे सगळ्यांचे लक्ष आहे.
