सांगली - लोकसभा निवडणुकीच्या पार्श्वभूमीवर सांगली पोलिसांनी गुन्हेगारांच्यावर हद्दपारी कारवाईचा बडगा उगारला आहे. सांगली आणि मिरज तालुक्यातील २ टोळ्यातील १४ गुंडांना २ वर्षासाठी सांगलीसह ४ जिल्ह्यातून हद्दपार करण्यात आले आहे. पोलीस अधीक्षक सुहेल शर्मा यांनी ही धडक कारवाई केली आहे.
सांगली लोकसभा निवडणूक प्रक्रिया शांततेत व भयमुक्त वातावरणात पार पडावी, यासाठी सांगली पोलीस दलांकडून जिल्ह्यातील गुन्हेगारी टोळ्यांवर कायद्याचा बडगा उगारण्यात येत आहे. पोलीस अधीक्षक सुहेल शर्मा यांनी गेल्या २ महिन्यांपासून जिल्ह्यातील अनेक टोळ्यांवर मोक्का आणि हद्दपारीच्या कारवाईचा धडाका लावला आहे.
सांगली शहरातल्या आणि मिरज तालुक्याच्या अंकली येथील २ टोळ्यांवर हद्दपारीची कारवाई करण्यात आली आहे. २ टोळ्यातील सुमारे १४ जणांना २ वर्षांसाठी सांगली, सातारा, कोल्हापूर आणि सोलापूर या ४ जिल्ह्यातून हद्दपार करण्यात आले आहे.या दोन्ही टोळीतील गुंडांवर मारामारी, खुनाचे प्रयत्न, खंडणी, असे अनेक गंभीर गुन्हे दाखल होते. त्यामुळे या सर्वांच्या विरोधात हद्दपारीचा प्रस्ताव तयार करण्यात आला होता.
पोलीस अधीक्षक सुहेल शर्मा यांनी याला मंजुरी दिली आहे. जिल्ह्यातील आणखी काही टोळ्या पोलिसांच्या रडारावर असून लवकरच या टोळीच्या साथीदारांवर हद्दपारीची कारवाई होईल, असा इशाराही सुहेल शर्मा यांनी दिला आहे.
