सांगली - कोरोनाच्या वाढत्या प्रसाराला लक्षात घेऊन १०० वे अखिल भारतीय नाट्यसंमेलन रद्द करण्यात आले आहे. त्यामुळे याठिकाणी पार पडणारे संमेलन तात्पुरते स्थगित झाले आहे. अखिल भारतीय नाट्य परिषदेचे अध्यक्ष प्रसाद कांबळी यांनी ही याबाबत घोषणा केली.
अखिल भारतीय नाट्य परिषदेचे यंदा शताब्दी वर्ष साजरे होत आहे. यानिमित्ताने 100 वे नाट्य संमेलनाचा सोहळा मोठ्या जल्लोषात साजरा करण्याचे आयोजन नाट्य परिषदेकडून करण्यात आले होते. या सोहळ्याचे उद्घाटन सोहळा नाट्यपंढरी सांगलीमध्ये पार पडणार होते. तर दुसरीकडे देशात आणि राज्यात कोरून व्हायरसचा वाढता प्रादुर्भाव लक्षात घेता, राज्य सरकार कडून जत्रा,यात्रा आणि गर्दी होणारे कार्यक्रम रद्द करण्यात यावेत, अशा सूचना संबंधितांना दिले आहेत. या पार्श्वभूमीवर नाट्य परिषदेने २६ मार्च ते २९ मार्च रोजी सांगलीमध्ये आयोजित करण्यात आलेले १०० वे नाट्यसंमेलन रद्द करण्यात आल्याचे जाहीर केले आहे. परिषदेचे अध्यक्ष प्रसाद कांबळी यांनी मुंबईमध्ये ही घोषणा केली आहे. पुढील परिस्थिती पाहून संमेलनाच्या पुढील तारखा जाहीर करण्यात येतील, असेही स्पष्ट करण्यात आले आहे. त्यामुळे सांगलीमध्ये पार पडणारे संमेलन तूर्त स्थगित झाले आहे.
हेही वाचा - कोरोना: केंद्र सरकारने नागरिकांच्या मदतीसाठी जारी केले हेल्पलाईन नंबर
असे होते सोहळ्याचे आयोजन -
26 मार्च ते 29 मार्च दरम्यान या सोहळ्याचे आयोजन करण्यात आले होते. या उद्घाटन सोहळ्याचा निमित्ताने चार दिवस सांगली मध्ये ग्रंथदिंडी, विविध नाटक, कलाविष्कार संपन्न होणार होते. 25 मार्च रोजी तामिळनाडूच्या तंजावर मध्ये नांदीने नाट्य संमेलनाची सुरुवात आणि त्यानंतर 26 रोजी सांगली मध्ये नाटकांचे सादरीकरण होऊन 27 रोजी उद्घाटन सोहळा पार पडणार होता. या सोहळ्याचे उदघाटन प्रसिद्ध लेखिका सई परांजपे यांच्या हस्ते तर स्वागताध्यक्ष व राष्ट्रवादीचे नेते शरद पवार, नाट्य संमेलन अध्यक्ष जब्बार पटेल, यांच्यासह मान्यवर मंडळी उपस्थित राहणार होते.
