रत्नागिरी - राष्ट्रीय महामार्ग अधिकाऱ्यांना दमदाटी आणि नवीन जगबुडी पुलाच्या रेलिंगला बांधल्याप्रकरणी अटकेत असलेले मनसे नेते आणि खेडचे नगराध्यक्ष वैभव खेडेकर यांची आज जामिनावर सुटका झाली. दरम्यान, कारागृहातून बाहेर आल्यानंतर प्रतिक्रिया देताना त्यांनी अधिकाऱ्यांवर जोरदार टीका केली. तसेच शिवसेना नेते पर्यावरण मंत्री रामदास कदम यांच्यावरही त्यांनी अप्रत्यक्षरीत्या आरोप केले.
यावेळी ते म्हणाले, राजकीय षड्यंत्र वापरून ही चळवळ दाबून टाकण्याचा प्रयत्न झाला. मला जामीन मिळू नये, मी खडी फोडायला जावे, मनसेची वाटचाल थांबावी, अशा पद्धतीचे अनेक प्रकार याठिकाणी झाले. मी कुठेतरी त्यांना राजकारणात अडचणीचा ठरत होतो आणि माझे नगराध्यक्ष पद काहींना अडचणीचे वाटत होते. त्यामुळे मला ३ महिने आत ठेवून माझे नगराध्यक्ष पद काढून घ्यायचे आणि आपला माणूस त्याठिकाणी बसवायचा अशा पद्धतीचे राजकारण झाला. परंतु, जनतेचा आणि कुलस्वामिनीचा आशीर्वाद असल्यामुळे मी कार्यकर्त्यांच्या जोरावर बाहेर आलो, अशी प्रतिक्रिया त्यांनी यावेळी दिली.
माझ्यावर गुन्हा दाखल करणारे हे सरकारी गुंड आहेत -
मी वैयक्तिक स्वार्थासाठी नाही तर जनतेच्या हितासाठी त्या ब्रिजवर गेलो होतो. २९ जूननंतर २ जुलैला गुन्हा दाखल होतो. म्हणजे यामध्ये राजकारण आहे. सत्तेचा वापर करून माझ्यासारख्या चळवळीतल्या कार्यकर्त्याला दाबण्याचा हा प्रकार झाला. माझ्यावर गुन्हा दाखल करणारे हे सरकारी गुंड आहेत. ३५३ चा आधार घेऊन जनतेचा आवाज दाबण्याचा हा प्रयत्न आहे. पण जनतेच्या हितासाठी मी शांत बसणार नाही तर सतत आग्रही राहणार. या एकूण प्रकरणातून जनतेने बोध घ्यावा. ३५३ चा आधार घेऊन असे गंभीर गुन्हे दाखल झाले तर सरकारी गुंडांना जाब विचारणारे कार्यकर्ते राहणार नाहीत. त्यामुळे ३५३ च्या बाबतीत सर्वांनीच आवाज उठवायला हवा, असेही खेडकर यांनी यावेळी म्हटले.
काय होते प्रकरण ?
२९ जून रोजी नवीन जगबुडी पुलाच्या जोडरस्त्याला मोठमोठी भगदाडे पडल्याचे निदर्शनास आल्यानंतर राष्ट्रवादी काँग्रेस आणि मनसेकडून महामार्गावर रास्ता रोको आंदोलन करण्यात आले होते. दरम्यान, वैभव खेडेकर आणि त्यांच्या काही कार्यकर्त्यांनी जगबुडी पुलाच्या जोड रस्त्याबाबतच्या निकृष्ट कामाला अधिकाऱ्यांना जबाबदार धरत त्यांना पुलाच्या रेलिंगला बांधलं होते. या प्रकरणामुळे ९ जुलै रोजी वैभव खेडेकर यांच्यासह काही कार्यकर्त्यांना अटक करण्यात आली होती. २ दिवसांच्या पोलीस कोठडीनंतर वैभव खेडेकर न्यायालयीन कोठडीत होते. दरम्यानच्या काळात पोलीस आणि नगरपालिकेच्या अहवालानंतर जिल्हाधिकाऱ्यांनी त्यांचे नगराध्यपदाचे अधिकार उपनगराध्यक्षांकडे दिले होते.
