जिल्हा रुग्णालयात असुविधा, अत्यावश्यक सामान खेरदीत भ्रष्टाचार- निलेश राणे

काल रत्नागिरीत पत्रकार परिषदेचे आयोजन करण्यात आले होते. त्यावेळी निलेश राणे यांनी जिल्हा रुग्णालयातील अव्यवस्थेबाबत नाराजी व्यक्त केली. ते म्हणाले की, रत्नागिरीची अवस्था ही बिकट होत चालली आहे. अवघ्या १० व्हेंटिलेटरवर जिल्ह्याचे आरोग्य अवलंबून आहे. जिल्हा रुग्णालयाची ही अवस्था आहे, तर इतर छोट्या रुग्णालयांची अवस्था काय असेल, असा सवाल राणे यांनी केला आहे.

रत्नागिरी- जिल्ह्यात आरोग्याचे तीन-तेरा वाजले आहेत. जिल्हा रुग्णालयात १३१ वैद्यकीय अधिकारी आस्थापनेवर दाखवत आहेत, मात्र सध्या १७ ते १८ च डॉक्टर काम करत आहेत. जिल्हा रुग्णालयात २७ दिवसांपासून एम.डी फिजीशियन नाही, असे सांगत जिल्हा रुग्णालयातील कारभाराबाबत भाजप नेते व माजी खासदार निलेश राणे यांनी काल (8 ऑगस्ट) उघडपणे नाराजी व्यक्त केली. तसेच त्यानी कोरोनावरून प्रशासनासह लोकप्रतिनिधींचा खरपूस समाचार घेतला.

काल रत्नागिरीत पत्रकार परिषदेचे आयोजन करण्यात आले होते. त्यावेळी निलेश राणे यांनी जिल्हा रुग्णालयातील अव्यवस्थेबाबत नाराजी व्यक्त केली. ते म्हणाले की, रत्नागिरीची अवस्था ही बिकट होत चालली आहे. अवघ्या १० व्हेंटिलेटरवर जिल्ह्याचे आरोग्य अवलंबून आहे. जिल्हा रुग्णालयाची ही अवस्था आहे, तर इतर छोट्या रुग्णालयांची अवस्था काय असेल, असा सवाल राणे यांनी केला आहे.

कामथे रुग्णालयातील 5 डॉक्टरांनी राजीनामा दिला आहे. त्यामुळे रुग्णालयातील 70 रुग्णांना एक डॉक्टर पाहतो आहे. हे चित्र भयानक आहे. याबाबत कोणी विचारपूस करत नाही. रुग्णालयात काय चालले आहे, त्याकडे कोणी पाहात नाही. ही गंभीर अवस्था असल्याचे राणे म्हणाले. दरम्यान, ही सर्व परिस्थिती आपण आरोग्य मंत्री राजेश टोपे यांच्या निदर्शनास आणून देणार आहोत. आणि तरीही विषय सुटला नाही तर आंदोलन करणार असल्याचा इशारा राणे यांनी दिला.

रत्नागिरीचे पालकमंत्री हे मिस्टर इंडिया

दरम्यान, रत्नागिरीचे पालकमंत्री हे मिस्टर इंडिया असल्याची बोचरी टीका माजी खासदार निलेश राणे यांनी केली. रत्नागिरीला पालकमंत्री आहेत की नाही? असतील तर ते नेमके असतात तरी कुठे? असा सवाल देखील त्यांनी यावेळी उपस्थित केला.

जिल्हा शल्यचिकित्सकांवर दडपण

जिल्हा शल्य चिकित्सक डॉ. अशोक बोल्डे हे गेल्या काही दिवसांपासून प्रचंड तणावाखाली आहेत. त्यांच्यावर सर्वात मोठे दडपण आले आहे. रुग्णालयात अत्यावश्यक सेवेसाठी जी खरेदी करायची असते त्या समितीचे अध्यक्ष जिल्हाधिकारी असतात. मात्र, अंतिम स्वाक्षरी ही जिल्हा शल्यचिकित्सकांची होते. काही खरेदींवर स्वाक्षरी न केल्याने त्यांच्यावर मोठा दबाव आल्याचा आरोप निलेश राणे यांनी केला. तसेच, रुग्णालयातील अत्यावश्यक खरेदी अव्वाच्या सव्वा दराने सुरू असून याबाबत कोणी जबाबदारी घ्यायला तयार नाही. उघड भ्रष्टाचार सुरू असल्याचा आरोपही राणे यांनी केला.

हेही वाचा- कोरोनामुळे आणखी तिघांचा मृत्यू; जिल्ह्यातील मृतांचा आकडा 71 वर