रत्नागिरी - जिल्ह्यातील शिवसेनेच्या चारही उमेदवारांनी एकाच दिवशी आपले उमेदवारी अर्ज दाखल केले. जोरदार शक्तिप्रदर्शन करत दापोली, चिपळूण, गुहागर आणि राजापूरमधील उमेदवारांनी अर्ज दाखल केले. तर काँग्रेस-राष्ट्रवादी काँग्रेस आघाडीच्या तीन उमेदवारांनी आपले उमेदवारी अर्ज दाखल केले.
दापोली विधानसभा मतदारसंघात शिवसेनेचे ज्येष्ठ नेते आणि राज्याचे पर्यावरण मंत्री रामदास कदम यांचा मुलगा योगेश कदम शिवसेनेकडून निवडणुकीच्या रिंगणात आहेत. काँग्रेस-राष्ट्रवादी आघाडीचे उमेदवार विद्यमान आमदार संजय कदम यांनीही उमेदवारी अर्ज दाखल केला. ते दुसऱ्यांदा निवडणुकीला सामोरे जात आहेत.
हेही वाचा - रत्नागिरीत पाचही जागा शिवसेनेच्या वाट्याला; भाजप कार्यकर्त्यांचा बंडखोरीचा पवित्रा
गुहागर मतदारसंघात शिवसेनेच्या भास्कर जाधव यांनी उमेदवारी अर्ज दाखल केला. गुहागर हा भाजपचा परंपरागत मतदारसंघ आहे. मात्र, राष्ट्रवादीतून शिवसेनेत आलेल्या भास्कर जाधव यांच्यासाठी युतीकडून हा मतदारसंघ शिवसेनेला सोडण्यात आला.
हेही वाचा - प्रदुषणमुक्तीचा संदेश देत कोल्हापुरात ऋतुराज पाटीलांनी सायकलवरून भरला उमेदवारी अर्ज
चिपळूण मतदारसंघातून शिवसेनेचे सदानंद चव्हाणांनी उमेदवारी अर्ज दाखल केला. चव्हाण हे तिसऱ्यांदा निवडणुकीच्या रिंगणात उतरले आहेत. यावेळी त्यांना हॅटट्रिक करण्याची संधी आहे.
हेही वाचा - 'साहेब माफ करा राम कदमला यावेळी मतदान नाही', शिवसैनिकांची घाटकोपरमध्ये बॅनरबाजी ?
राजापूरमधील शिवसेनेचे विद्यमान आमदार राजन साळवी यांच्यावर शिवसेना नेतृत्वाने पुन्हा एकदा विश्वास टाकला आहे. राजन साळवींनीही आपला उमेदवारी अर्ज दाखल केला. काँग्रेसकडून अविनाश लाड यांनी आपला उमेदवारी दाखल केली.
रत्नागिरी विधानसभा मतदारसंघातून राष्ट्रवादी काँग्रेसचे उमेदवार सुदेश मयेकर यांनी उमेदवारी अर्ज दाखल केला.
