रत्नागिरी - बुधवारी रात्री दापोलीतील चौघांचा कोरोना रिपोर्ट पॉझिटिव्ह आला होता. यानंतर यातील एक रुग्ण बाहेर जातो असे सांगून पळून गेल्याची धक्कादायक घटना उघडकीस आली आहे. दापोली तालुक्यातील बोरीवली वरचीवाडी येथील हा रुग्ण आहे. या रुग्णाचा सध्या शोध सुरु आहे.
जिल्हा प्रशासनाला बुधवारी रात्री प्राप्त झालेल्या अहवालांपैकी 22 जणांचे कोरोना अहवाल पॉझिटिव्ह आले होते. यामध्ये दापोली तालुक्यातील चौघांचा समावेश होता. बोरीवली येथील शाळेत 28 नागरिकांना क्वारंटाईन करण्यात आले होते. यातल्या एकाचा रिपोर्ट पॉझिटिव्ह आल्याने त्या रुग्णाला आणण्यासाठी रात्री रुग्णवाहिका गेली होती. मात्र, रुग्णवाहिका पोहोचण्याआधीच त्या रूग्णाने जरा बाहेर जाऊन येतो, असे सांगून पलायन केले.
रात्रीपासून या व्यक्तीला शोधण्यासाठी प्रशासन कर्मचारी, पोलीस, ग्रामस्थ शर्थीचे प्रयत्न करत आहेत. परिसरातील जंगल भागातही शोध घेण्यात आला आहे. मात्र, अद्याप हा रुग्ण प्रशासनाला सापडलेला नाही. त्याचा शोध सध्या सुरूच आहे.
रत्नागिरीतही संस्थात्मक क्वारंटाईन केलेला नागरिक पसार -
रत्नागिरीतही संस्थात्मक क्वारंटाईन केलेला एक नागरिक पसार झाला आहे. त्याच्यावर रत्नागिरी शहर पोलीस ठाण्यात गुन्हा दाखल करण्यात आला आहे. मुंबईतून रत्नागिरीत आलेल्या एका नागरिकाची 5 मे रोजी स्वॅब चाचणी करण्यात आली होती. त्याचा रिपोर्ट निगेटिव्ह आल्यानंतर त्याच्या हातावर क्वारंटाईनचा शिक्का मारलेला होता.
सदर व्यक्तीला रत्नागिरीत क्वारंटाईन करण्यात आले होते. मात्र, तो मंगळवारी बाथरुमच्या दरवाजातून उडी मारुन पळून गेला. त्यामुळे त्याच्यावर भादवी कलम 269, 270 आपत्ती व्यवस्थापन कायदा कलम 188, 51 (अ), साथीचे रोग प्रतिबंधक कायदा कलम 3 प्रमाणे गुन्हा दाखल करण्यात आला आहे.
