रत्नागिरी - माझा सनातन संस्थेशी संबंध जोडणे हे एक षड्यंत्र असून यामागे शिवसेना आणि महाराष्ट्र स्वाभिमानी पक्षाचा हात असल्याचा आरोप आघाडीचे उमेदवार नविनचंद्र बांदिवडेकरांनी केला आहे. बुधवारी रत्नागिरीत आयोजित पत्रकार परिषदेत ते बोलत होते. रत्नागिरी- सिंधुदुर्ग लोकसभा मतदार संघात शिवसेना आणि स्वाभिमानी पक्षाला आपली उमेदवारी डोईजड जाईल म्हणून माझा सबंध थेट सनातनशी जोडला गेला, असे म्हणत त्यांनी विरोधकांवर निशाणा साधला.
या पत्रकार परिषदेला राष्ट्रवादी काँग्रेसचे कुमार शेट्ये, काँग्रेसच्या विधान परिषद आमदार हुस्नबानो खलिफे, राजीव किर आदी पदाधिकारी उपस्थित होते. आघाडीकडून रत्नागिरी सिंधुदुर्ग लोकसभा मतदार संघासाठी नवीनचंद्र बांदिवडेकरांच्या नावाची घोषणा झाल्यानंतर त्यांच्यावर सनातनशी संबध असल्याचा आरोप झाला होता.सोशल मीडियावरही बांदिवडेकर ट्रोल झाले होते. नेटिझन्सनी काँग्रेस आणि बांदिवडेकर यांच्यावर टीकेची झोड उठवली होती. राष्ट्रवादी काँग्रेसचे जितेंद्र आव्हाड यांनीही बांदिवडेकरांच्या उमेदवारीवर आक्षेप घेतला होता. त्यामुळे बांदिवडेकरांची उमेदवारी धोक्यात आली होती.
काँग्रेस हायकमांडकडने देखील बांदिवडेकरांकडे स्पष्टीकरण मागितले होते. मात्र, सनातनशी आपला काहीही संबंध नसल्याचे सांगत केवळ समाज म्हणून त्यावेळी कार्यक्रमात गेल्याचे त्यांनी स्पष्ट केले होते. सर्व घडामोडीनंतर काँग्रेसने बांदिवडेकरांची उमेदवारी कायम असल्याचे जाहीर केले. या वादानंतर आज पहिल्यांदाच रत्नागिरीत घेतलेल्या पत्रकार परिषदेत हे सर्व षड्यंत्र असल्याचा त्यांनी आरोप केला.
माझे तिकिट कापले जावे हा विरोधकांचा उद्देश होता. तसेच एवढे करूनही उमेदवारी कायम राहिली तर काँग्रेसची पारंपरिक मते दूर जावीत हा यामागे विरोधकांचा उद्देश होता, असा आरोप बांदिवडेकरांनी केला आहे. ३० मार्चला उमेदवारी अर्ज भरणार असल्याचे नविनचंद्र बांदिवडेकर यांनी आज स्पष्ट केले.
