रत्नागिरी - नगरपरिषदेच्या नगराध्यक्ष पदाच्या पोटनिवडणुकीसाठी उमेदवारी अर्ज दाखल करण्याची आज शेवटची तारीख होती. शेवटच्या दिवशी भाजप, राष्ट्रवादी, मनसे या तीनही पक्षांनी जोरदार शक्तीप्रदर्शन करत आपले उमेदवारी अर्ज दाखल केले. तीनही पक्षांनी केलेल्या घोषणाबाजीने संपूर्ण परिसर दणाणून गेला होता.
पोटनिवडणुकीसाठी २९ डिसेंबरला मतदान प्रक्रिया होणार आहे. शिवसेना, भाजप आमने सामने ठाकलेली असतानाच आता राष्ट्रवादी काँग्रेस व मनसेने देखील आपले उमेदवार रिंगणात उतरवले आहेत. मंगळवारी शिवसेनेचे उमेदवार प्रदीप उर्फ बंड्या साळवी यांनी जोरदार शक्तीप्रदर्शन करत आपला उमेदवारी अर्ज दाखल केला होता. त्यामुळे शिवसेनेला आपली ताकत दाखवण्यासाठी भाजप, राष्ट्रवादी, मनसे या तीनही पक्षांनी मोठे शक्तीप्रदर्शन करत उमेदवारी अर्ज दाखल केले.
हेही वाचा - यश अपयशातून उभे राहण्याची उर्जा आईकडून मिळाली - शरद पवार
भाजपचे उमेदवार अ‌ॅड.दीपक पटवर्धन यांनी मुहूर्तावर आपला उमेदवारी अर्ज दाखल केला. दुपारी १२ वाजण्याच्या सुमारास मोठे शक्तीप्रदर्शन करत पटवर्धन यांनी आपला उमेदवारी अर्ज दाखल केला. यावेळी माजी मंत्री रवींद्र चव्हाण, माजी नगराध्यक्ष अशोक मयेकर, महेंद्र मयेकर, राजेश सावंत, तालुकाध्यक्ष सुशांत चवंडे, शहर अध्यक्ष अण्णा करमरकर यांच्यासह नगरसेवक राजेश तोडणकर, सुप्रिया रसाळ, मानसी करमरकर, प्रणाली रायकर आदींसह सर्व नगरसेवक, भाजप पदाधिकारी व कार्यकर्ते मोठया संख्येने उपस्थित होते. अ‌ॅड. दीपक पटवर्धन यांचा उमेदवारी अर्ज दाखल करण्यासाठी आमदार प्रसाद लाड, माजी खासदार निलेश राणे हे व्यस्त कार्यक्रमामुळे उपस्थित राहू शकले नाहीत.
दुसरीकडे महाविकास आघाडीत स्थानिक पातळीवर उभी फूट पडल्यानंतर राष्ट्रवादीने आपला उमेदवार जाहीर केला होता. राष्ट्रवादीकडून माजी नगराध्यक्ष मिलिंद किर यांनी उमेदवारी अर्ज दाखल केला आहे. जोरदार घोषणाबाजी करत किर यांचा उमेदवारी अर्ज दाखल करण्यात आला. यावेळी काँग्रेस, राष्ट्रवादी, बसपा आदी पक्षांच्या कार्यकर्त्यांनी परिसर दणाणून सोडला. यावेळी माजी जिल्हाध्यक्ष कुमार शेट्ये, नगरसेवक सुदेश मयेकर, माजी नगरसेवक सईद पावसकर यांच्यासह अनेक पदाधिकारी, कार्यकर्ते मोठ्या संख्येने उपस्थित होते.
हेही वाचा - बनावट सिमेंट विकणाऱ्या ७ जणांना अटक; शहर पोलिसांची कारवाई
गुरुवारी उमेदवारी अर्ज दाखल करण्याची शेवटची मुदत होती. अपेक्षेप्रमाणे मनसेने देखील आपला उमेदवारी अर्ज यावेळी दाखल केला. मारुती मंदिर ते नगर परिषद अशी भव्य रॅली काढत मनसेचे उमेदवार रूपेश सावंत यांनी उमेदवारी अर्ज दाखल केला. प्रदीर्घ कालावधीनंतर आज मनसेने केलेले शक्तीप्रदर्शन लक्षणीय होते. सर्वच राजकीय पक्षांनी आपली ताकत दाखवण्याचा प्रयत्न यावेळी केला, त्यामध्ये मनसे देखील मागे राहिली नाही.
मनसेचे उमेदवार रुपेश सावंत यांचा उमेदवारी अर्ज दाखल करण्यासाठी जिल्हाध्यक्ष जितेंद्र चव्हाण, तालुकाध्यक्ष महेंद्र नागवेकर, विजय जैन, आनंद शिंदे, विश्वजित सावंत, सचिन शिंदे आदी उपस्थित होते.
