रत्नागिरी - आमदार उदय सामंत यांनी रत्नागिरी तालुक्यातील निवळी आणि बावनदी परिसरातील ग्रामस्थांना पाणी मिळवून देण्यासाठी, आक्रमक होत एमआयडीसीच्या अधिकाऱ्यांना धारेवर धरले. त्यांनी शासनाच्या नियमानुसार पहिल्यांदा पिण्यासाठी पाणी द्या आणि नंतर जिंदाल कंपनीला पुरवठा करा, असे सांगत अधिकाऱ्यांना चांगलेच खडेबोल सुनावले. जर ग्रामस्थांना पिण्यासाठी पाणी मिळाले नाही तर उद्रेक होईल, त्यानंतर जे काही घडेल त्याला जबाबदार अधिकारी असतील, असे त्यांनी सांगितले. त्यामुळे अधिकाऱ्यांनी अखेर जिंदाल कंपनीचे पाणी बंद करुन प्रथम ग्रामस्थांना टँकरने पाणी पुरवठा करण्याचा निर्णय घेतला.
रत्नागिरी तालुक्यातील बावनदी आणि निवळी गावात पाणीटंचाई जाणवत आहे. या परिसरातील पाणीपुरवठा करणाऱ्या 4 विहिरींनी तळ गाठला आहे. या परिसरात धरण आहे. मात्र, एमआयडीसीकडून नियम धाब्याबर बसवत ग्रामस्थांना तहानलेले ठेऊन जिंदाल कंपनीला पाणी पुरवले जाते असल्याचे ग्रामस्थांचे म्हणणे आहे. अनेक वेळा पाण्यासाठी सुतारवाडी, बाईतवाडी यासह बावनदी गावातील लोकांनी जिल्हाधिकाऱ्यांना निवेदन दिले होते. मात्र, यावर प्रशासनाने यावर काहीच तोडगा काढला नाही. यामुळे ग्रामस्थांमधून संताप व्यक्त केला जात आहे.
दरम्यान, ही बाब समजताच परिसरातील ग्रामस्थांना पाणी मिळवून देण्यासाठी म्हाडा अध्यक्ष आमदार उदय सामंत आक्रमक झाले होते. त्यासाठी त्यांनी धरणावर जाऊन एमआयडीसीच्या अधिकाऱ्यांना धारेवर धरले. त्यांच्या या रौद्ररुपामुळे नरमलेल्या अधिकाऱ्यांनी जिंदाल कंपनीचे पाणी तत्काळ बंद करण्याचे आदेश दिले. त्यांनतर लगेचच पाणी बंद करण्यात आले.
निवळी येथील टाकीवरून टँकरने पाणी पुरवठा करण्याची तयारी जिंदाल कंपनी आणि एमआयडीसीने दर्शवली आहे. दिवसाला 2 टँकर या परिसरात दिले जाणार आहेत. ही व्यवस्था पाऊस पडेपर्यंत केली जाईल असे आश्वासन कंपनी प्रतिनिधी आणि एमआयडीसी अधिकाऱ्यांनी दिले. त्यावरून ग्रामस्थांनी समाधान व्यक्त केले. यावेळी एमआयडीसीचे कार्यकारी अभियंता पी. ती. करावडे, वि. पी. शेलार, बी. एन. पाटील, जिंदलचे पेंडंन्न रामायणम, विपिन दहिवसे, जिल्हा परिषद सद्यस्य परशुराम कदम, पंचायत समिती सदस्य साक्षी रावणग, सरपंच वेदिक रावणग यांच्यासह ग्रामस्थ उपस्थित होते.
