रायगड - शिवसेना, राष्ट्रवादी काँग्रेस आणि काँग्रेस यांच्या महाविकास आघाडीचे सरकार स्थापन झाले असून महाविकास आघाडीचे उद्धव ठाकरे हे मुख्यमंत्री झाले आहेत. तर, शिवसेना, राष्ट्रवादी आणि काँग्रेस या पक्षाच्या प्रत्येकी २ जणांनी कॅबिनेट मंत्रिपदाची शपथ घेतली आहे. इतर कॅबिनेट आणि राज्यमंत्री पदाची शपथ लवकरच महाविकास आघाडीकडून होणार आहे. त्यामुळे रायगडमधून कोणाला संधी मिळून पालकमंत्री पदाची धुरा दिली जाईल, की पुन्हा जिल्ह्याला बाहेरचा पालकमंत्री लादला जाईल, याकडे आता रायगडकरांचे लक्ष लागले आहे. शिवसेनेचे महाड विधानसभेचे आमदार भरत गोगावले यांना संधी मिळेल, अशी चर्चा असली तरी गोगावले यांना मंत्रिपद मिळेल की नाही? हे पक्ष नेतृत्वावर ठरणार आहे.
रायगड जिल्ह्यात महाविकास आघाडीतील शिवसेनेचे महाडमधून भरत गोगावले, अलिबाग महेंद्र दळवी आणि कर्जत महेंद्र थोरवे हे ३ आमदार निवडून आले आहेत. तर, राष्ट्रवादी काँग्रेसकडून राष्ट्रवादीचे सरचिटणीस खासदार सुनील तटकरे यांच्या कन्या अदिती तटकरे ह्या एकमेव निवडून आल्या आहेत. महेंद्र दळवी, महेंद्र थोरवे आणि अदिती तटकरे हे पहिल्यांदाच आमदार म्हणून निवडून विधानसभेवर गेले आहेत तर, भरत गोगावले यांची ही तिसरी टर्म आहे. त्यामुळे भरत गोगावले यांना मंत्रिपद मिळण्याची शक्यता आहे.
हेही वाचा - मुंबई-पुणे द्रुतगती महामार्गावर भीषण अपघात; चौघांचा मृत्यू, २ जखमी
राष्ट्रवादीचे सरचिटणीस, खासदार सुनील तटकरे हे सुद्धा मुलगी अदिती तटकरे यांना मंत्रिपद मिळविण्यासाठी प्रयत्नशील आहेत. त्यामुळे अदिती यांनाही राष्ट्रवादीकडून मंत्रिपद मिळू शकते. मात्र, तटकरे कुटुंबात खासदार आणि २ आमदार अशी पदे राष्ट्रवादीकडून दिली आहेत. तर, मंत्रिपदासाठी भाऊगर्दी असल्याने अदिती तटकरे यांना पहिल्याच टर्ममध्ये संधी मिळेल असे दिसत नाही.
शिवसेनेमध्येही मंत्रिपदासाठी अनेक जण इच्छुक असल्याने भरत गोगावले यांना पक्षाकडून संधी मिळेल की, नाही यात शंका आहे. मात्र, आगामी राजकीय परिस्थितीनुसार जिल्ह्यात शिवसेनेचे वर्चस्व वाढले आहे. त्यामुळे शिवसेनेतर्फे रायगडाला मंत्रिपदाची संधी मिळणे गरजेचे आहे. मात्र, तूर्तास तरी रायगडला मंत्रिपद मिळेल की नाही, याबाबत चर्चेला सुरुवात झाली आहे.
हेही वाचा - महाविकास आघाडीचे सरकार आल्याने पनवेलमध्ये शेकापचा जल्लोष
