रायगड - मुंबई-पुणे महामार्गावर रोज कुठे ना कुठे अपघात होतात. या अपघातांमध्ये अनेकजण मृत्यूमुखी पडतात, तर काही जण गंभीर जखमी होतात. अशा वेळी अपघातस्थळी थांबण्याची व त्यांना मदत करण्याची तसदी शक्यतो कोणी घेत नाही. त्यामुळे बऱ्याच वेळा मदत मिळण्यास उशीर झाल्याने जखमी प्रवाशांचे मृत्यू होतात. परंतु, या महामार्गावरील अपघातग्रस्तांना मदतीसाठी साठीलकर भगिनी तत्पर आहेत. या भगीनींनी अपघातग्रस्तांच्या मदतीचे व्रत हाती घेतले आहे. जागतिक महिला दिनाच्या निमित्ताने ईटीव्ही भारतने त्यांच्या कार्याचा घेतला हा धांडोळा.
जिल्ह्यातील खोपोली शहरात राहणाऱ्या पूजा व भक्ती ह्या श्रद्धा साठीलकर व गुरुनाथ साठीलकर यांच्या कन्या आहेत. या दोघीही बहिनी अभियांत्रिकी पदवीधारक आहेत. पूजा ही इंटेरियर डिझायनिंगचा व्यवसाय करते तर भक्ती इंजिनीयर होऊन एमबीएचे शिक्षण घेत आहे. उच्च शिक्षित असूनही या दोघीनी वडिलांचा आदर्श घेऊन अपघातग्रस्तांना मदतीचा वसा उचललेला आहे. त्यांचे वडील गुरुनाथ साठीलकर हे अपघातग्रस्तांच्या मदतीसाठी सामाजिक संस्थेच्या माध्यमातून गेली २० ते २५ वर्ष मुंबई-पुणे महामार्ग तसेच खालापुरमध्ये अपघातग्रस्तांना मदत करीत आहेत.
वडिलांचे हे मदतीचे कार्य पूजा व भक्ती लहानपणापासून पाहत आलेल्या आहेत. यातून प्रेरणा घेऊन दोघीही बहिणी वडिलांच्या खांद्याला खांदा लावून अपघातग्रस्तांची सेवा करीत आहेत. महामार्गावर रोज अपघात होत असतात. या अपघातांची माहिती संस्थेच्या व्हाटस ग्रुपवर आल्यानंतर पूजा व भक्ती आपल्या सहकाऱयांसोबत अपघातस्थळी मदतीसाठी धावून जातात. त्या जखमी प्रवाशांना रुग्णालयात दाखल करतात. औषधोपचार करून त्याचे नातेवाईक येईपर्यंत त्यांची काळजी घेतात.
या सेवेमधून कोणताही आर्थिक फायदा मिळत नसला तरी कोणाचा तरी जीव वाचत असल्याने मानसिक समाधान मिळत असल्याचे पूजा व भक्ती सांगतात. या कार्यासाठी अनेक सामाजिक संस्थांनी त्यांचा सत्कार केलेला आहे. तसेच अपघात झाल्यानंतर अपघातग्रस्तांची मदत करा असे, आवाहनही दोघी बहिणी सर्वांना करतात.
जागतिक महिला दिनाच्या निमित्ताने साठीलकर बहिणींचे काम अनेकांना स्फूर्ती देणारी आहे. इतर क्षेत्रात काम करताना फक्त आर्थिक फायदा पाहिला जातो. मात्र, अपघातग्रस्तांना मदतीचा हात पुढे करताना आर्थिक फायदा न पाहता माणुसकीच्या नात्याने केली जाणारी त्यांची सेवा निश्चितच प्रेरणादायी आहे.
