रायगड - महाड शहरातील तारीक गार्डन इमारत दुर्घटना अजून ताजी असतानाच तालुक्यातील बिरवाडी गावामध्ये मोठ्या प्रमाणात धोकादायक अशी इमारत समोर आली आहे. हबीबा कॉप्लेक्ल नावाची ही इमारत धोकादायक झाली आहे. तारिक गार्डन इमारत दुर्घटनेसारखी घटना होऊ नये, यासाठी प्रशासनाने वेळीच पावले उचलली आहेत. महाडचे तहसीलदार सुरेश काशीद यांनी बिल्डरला नोटीस काढली आहे. तर इमारतीचे स्ट्रक्चर ऑडिट डॉ. बाबासाहेब आंबेडकर विद्यापीठाच्या तंत्र तज्ज्ञांकडून करून घेण्याचे आदेश दिले आहेत.
बिरवाडीमधील हबीबा कॉम्प्लेक्स इमारत धोकादायक
महाड शहरातील तारिक गार्डन इमारत दुर्घटनेत 17 जणांचा मृत्यू झाला असून दोन जण सुखरूप बचावले होते. त्यानंतर महाड शहरातील जुन्या इमारतीचा प्रश्न ऐरणीवर आला होता. मात्र महाड तालुक्यातील अन्य भागातही जुन्या इमारती ह्या धोकादायक असल्याचे समोर आले आहे. तालुक्यातील बिरवाडी येथील हबीबा कॉम्प्लेक्स ही इमारत धोकादायक झाली आहे. या इमारतीच्या तळ मजल्याच्या आरसीसी पिलर्सना तडे गेले आहेत. आतील लोखंडी सळ्या गंजून बाहेर आल्या आहेत. इमारतीचा स्लॅबदेखील अनेक ठिकाणी तडकला असून भिंतींनादेखील तडे गेले आहेत. असे असूनही या फ्लॅटधारक आणि गाळे धारक आपला जीव मुठीत घेऊन राहत आहेत.
सदनिका, गाळे धारक जीव मुठीत घेऊन करीत आहेत वास्तव्य
महाड तालुक्यातील बिरवाडी येथे तारीक गार्डन इमारतीइतकीच धोकादायक इमारत समोर आली आहे. ही इमारती बिरवाडी गावातील बाजारपेठेतील मुख्य रस्त्यावर असून त्या इमारतीमध्ये रहिवासी सदनिका, व्यवसायिक सदनिका आणि दुकान गाळे आहेत. या इमारतीमध्ये एका बँकेसह, दुकानगाळे आणि रहिवासी वापर सुरू आहे. इमारत धोकादायक ठरवली तर रहिवासी आणि गाळेधारकांचे काय होणार, या भितीने कॅमेऱ्यासमोर कोणीही बोलायला तयार नसले तरी रहिवाशांमध्ये घबराटीचे वातावरण निर्माण झाले आहे.
स्ट्रक्चरल ऑडिट करण्याचे तहसीलदार यांचे आदेश
बांधकाम ठेकेदाराने काही ठिकाणी प्लास्टर तर काही ठिकाणी टाइल्स लावून धोकादायक परिस्थिती लपवण्याचा प्रयत्न केला आहे. तर बांधकाम ठेकेदार आपली जबाबदारी झटकण्याचा प्रयत्न करीत आहे. आजही अनेक ठिकाणी पिलर्स, भिंती आणि स्लॅबला तडे गेल्याचे स्पष्टपणे दिसत आहे. या प्रकरणाची महाडचे तहसीलदार सुरेश काशीद यांनी गंभीर दखल घेतली असून संपूर्ण इमारतीचे स्ट्रक्चरल ऑडिट करून घेण्याचे आदेश काढले आहेत. स्ट्रक्चरल ऑडिटच्या अहवालानंतर योग्य ती कारवाई केली जाईल, असे तहसीलदार सुरेश काशीद यांनी सांगितले आहे.
