रायगड: खालापूर तालुक्यातील चौक ग्रामपंचायत हद्दीतील इर्शाळवाडी दरडी खाली गाडले गेले. हे ठिकाण ट्रेकर्ससाठी खूप महत्त्वाचे आणि जिव्हाळ्याचे होते. येथील स्थानिक ट्रेकर्स आणि पर्यटकांना आपलेसे बनवत असायचे. जीवाला जीव देणारी माणसे असलेली ही वाडी एका दिवसात दिसेनाशी झाली. इर्शाळवाडीवर आलेल्या या संकटाच्या जखमी कधीच भरुन निघाणाऱ्या नाहीत.
जिव्हाळ्याची ट्रेक : ट्रेकिंगला जाणाऱ्या लोकांची राहण्याची व खाण्यापिण्याची व्यवस्था इर्शाळवाडीतील ग्रामस्थ करीत होते. त्यामुळे ट्रेकर आणि ग्रामस्थ यांच्यात जिव्हाळ्याचे ऋणानुबंध जमले होते. दरड दुर्घटनेमुळे आता हा ऋणानुबंध कायमचा मिटणार की काय? असे दुःख साई सह्याद्री प्रतिष्ठान हिंदुस्थानचे महाराष्ट्र राज्य कार्याध्यक्ष समीर म्हात्रे यांनी व्यक्त केले. पेणसह रायगड जिल्ह्यातील असंख्य गडांची काळजी घेणाऱ्या समीर म्हात्रे आणि त्यांच्या सहकाऱ्यांनी आत्तापर्यंत तीनवेळा इर्शाळगडावर चढाई केली आहे. यावेळी इर्शाळवाडीत त्यांचे रात्रीचे वास्तव्य करत असायचे. तेथील आदिवासी समाजातील बांधव हे गरज लागल्यास प्रेमाने त्यांची राहण्याची व खाण्या-पिण्याची व्यवस्था करत असत.
काय म्हणाले समीर म्हात्रे : समीर म्हात्रे हे इर्शाळवाडीच्या ट्रेकला गेले होते. त्यावेळी त्यांना आलेल्या अनुभवाविषयी त्यांनी सांगितले आहेत. समीर म्हात्रे आतापर्यंत तीनवेळा इर्शाळवाडीच्या ट्रेकला गेले आहेत. म्हात्रे म्हणतात, काहीवेळा रात्री अपरात्री कधीही गेलो तरी ग्रामस्थ रात्री जेवण आणि सकाळी चहा-नाश्ताची सुविधा उपलब्ध करुन देत असत. तेथील लहान मुले आमच्यात येऊन खेळत बागडत असत. आम्ही पण त्यांच्यात रमून खूप मस्ती करत असायचो. ट्रेकिंगसाठी सोबत घेऊन जात असलेल्या नवनवीन वस्तूंची ते आपुलकीने माहिती करून घेत असत.आम्हीही तेथील लहान मुलांसाठी बिस्कीट, चॉकलेट, वेफर्स, शीतपेय आदी घेऊन जात असायचो. त्यामुळे वयोवृद्धांसह छोट्या मोठ्यांशी एकदम जिव्हाळ्याचे संबंध तयार झाल्याचे समीर म्हात्रे यांनी ईटीव्ही भारत प्रतिनिधीबरोबर बोलताना सांगितले.
स्वप्नांची झोपडी मातीत दबली: आम्ही अनेकदा आमच्या सदस्यांचे वाढदिवस इर्शाळवाडीमधील बच्चे कंपनीसोबत साजरे केले आहेत. त्यामुळे तेथील कुटुंबासोबत जिव्हाळ्याचे सबंध निर्माण झाले होते. दरड दुर्घटना घडल्यानंतर त्यांच्या ओळखीच्या गावातील पारधी यांना शिवभक्त अच्युत पाटील यांनी दुसऱ्या दिवशी फोन केला होता. पारधी हे रात्रीचे जेवण करून बसले होते. त्याचवेळी मोठे-मोठे आवाज झाल्याने तातडीने पारधी यांनी आपली पत्नी,मुलांना झोपडी बाहेर काढले. मिळेल त्या वाटेने झाडे झुडपे तुडवीत वाडीच्या खाली आले. पारधी यांची झोपडी मातीच्या ढिगाऱ्याखील दबले गेले आहेत. सध्या ते पूर्ण कुटुंब निराधार झाले आहे. शासनाने व्यवस्था केलेल्या ठिकाणी राहत आहेत. मात्र त्यांचे इतर नातेवाईक या दुर्घटनेत ढिगाऱ्याखाली दबले गेले, अशी माहिती अच्युत पाटील यांना पारधी यांनी दिली.
अन्न धान्याची मदत : इर्शाळगड हे ट्रेकसाठी आवडीचे ठिकाण होते. शिवभक्तांसाठी ही वाडी जिव्हाळ्याची होती. मात्र दरड कोसळल्याची दुर्घटना घडली हे गाव मातीच्या ढिगाऱ्याखाली गाडले गेले. जिव्हाळ्याची माणसे गेल्याने आम्हाला ही दुःख झाले आहे. आम्ही गेले दोन दिवस आमच्यापरीने अन्न धान्य व साधन सामुग्री घेऊन जात आहोत. पुढील दिवसांत इर्शाळगडावर गेल्यानंतर सोडून गेलेल्या आदिवासी बांधवांच्या आठवणीने मन भरून येणार यात तिळमात्र शंका नाही. आम्हाला सोडून गेलेल्या आदिवासी बांधवांना सुख शांती लाभो हीच ईश्वर चरणी प्रार्थना, अशी ट्रेकर्स ग्रुपने भावना व्यक्त केली आहे.
हेही वाचा-
