पनवेल - नगरसेवक जगदीश गायकवाड यांची तीन मुले आणि भाच्याने एका तरुणाच्या डोक्यात चक्क ८ बिअरच्या बाटल्या फोडून त्याच्यावर जीवघेणा हल्ला केला. विश्वनाथ गायकवाड असे या तरुणाचे नाव असून तो गंभीर जखमी झाला आहे. त्याला खासगी रुग्णालयामध्ये अतिदक्षता विभागात ठेवण्यात आले आहे. पनवेल येथील रोडपालीजवळच्या गिरीराज रेस्टॉरंट अँड बारसमोर शनिवारी (३ ऑगस्ट) रात्री साडे अकरा वाजण्याच्या सुमारास ही घटना घडली.
आम्ही नगरसेवकाची मुले आहोत, त्यामुळे आमच्या विरोधात पोलीस ठाण्यात तक्रार करायची हिंमत कशी होते, असे म्हणत पनवेलचे गोल्डमॅन नगरसेवक गायकवाड यांच्या सिध्दांत, संदेश आणि स्वप्निल या मुलांनी तरुणाला मारहाण केली. या घटनेमुळे कळंबोलीतील नागरिकांमध्ये दहशतीचे वातावरण निर्माण झाले आहे. सत्तेत असलेल्या नगरसेवकाची मुले असून सुद्धा पोलीस ठाण्यात तक्रार करण्याची हिंमत या तरुणाने केली. हे नगरसेवक पुत्रांना जिव्हारी लागल्यामुळे त्यांनी तक्रारदार तरुणाच्या भावाला एकट्यात गाठले आणि ५ गुंडांच्या मदतीने त्याच्या डोक्यावर आणि पाठीवर ८ बियरच्या बाटल्या फोडल्या. विश्वनाथ सध्या आयसीयुमध्ये आहे. आपल्या मुलाची अशी अवस्था पाहून हादरलेले विश्वनाथचे कुटुंबीय आजही नगरसेवक गायकवाड यांच्या दहशतीखाली राहत आहेत. मात्र, तरीही कळंबोलीचे पोलीस त्याकडे दुर्लक्ष करत आहे, असा आरोप पीडिताच्या कुटुंबियांनी केला आहे. या घटनेला ५ दिवस उलटले तरी अद्याप आरोपींना अटक केलेली नाही. त्यामुळे नगरसेवकच्या राजकीय वरदहस्तामुळे पोलीस कारवाई करण्यास टाळाटाळ करत असल्याचा आरोप कुटुंबीयांनी केला आहे.
पीडित तरुणाने तक्रार दिल्यानंतर पोलिसांनी ताबडतोब कारवाई केली असती तर आज आमच्या मुलावर हल्ला करण्याची हिंमत झाली नसती, असे म्हणत पीडित तरुणाच्या कुटुंबियांनी पोलिसांच्या कार्यवाहीवर प्रश्नचिन्ह उपस्थित केले आहे. त्यामुळे जर यावेळी आरोपींना पोलिसांनी अटक केली नाही तर आम्ही उपोषणाला बसू, असा इशारा पीडित कुटुंबियांनी दिला आहे.
पीडित तरुण सध्या आयसीयुमध्ये मृत्यूशी झुंज देत आहे. तरीही पोलिसांनी आरोपींविरोधात हत्येचा गुन्हा दाखल केलेला नाही. नवी मुंबई पोलीस दलातील 'सिंघम' अशी ओळख असलेल्या वरिष्ठ पोलीस निरीक्षक सतीश गायकवाड यांनी कळंबोली पोलीस ठाण्यामध्ये पदभार स्वीकारल्यानंतर कळंबोलीतील अनेक गुन्हेगारांचे धाबे दणाणून सोडले आहे. गुन्हेगारीचा बिमोड, पोलीस आणि जनतेतील सुसंवाद वाढवण्याबरोबरच कळंबोली पोलीस ठाण्याची प्रतिमा त्यांनी उंचावली आहे. तरीही या प्रकरणात मात्र, कळंबोली पोलीस आरोपींना शोधण्यात विलंब का करीत आहेत, असा प्रश्न उपस्थित होत आहे. यातील आरोपी हे नगरसेवक गायकवाड यांची मुले असल्याने पोलिसांचे हात त्यांच्यापर्यंत पोहोचण्यास उशीर होतोय का? अशी चर्चा सध्या पनवेलमध्ये सुरू आहे.
काय आहे प्रकरण?
या नगरसेवक पुत्र आणि भाच्याने ५ दिवसांपूर्वी विश्वनाथ गायकवाडचा भाऊ सिद्धार्थला मारहाण केली. त्याने याविरोधात तक्रार दाखल केली होती. याचा राग मनात ठेवून विश्वनाथवर जीवघेणा केला. या प्रकरणी कळंबोली पोलीस ठाण्यात करण्यात तक्रार दाखल करण्यात आली आहे. काही कारणावरुन नगरसेवक गायकवाड यांच्या मुलांनी सिद्धार्थला मारहाण केली होती. याबाबत त्याने कळंबोली पोलीस ठाण्यामध्ये तक्रार दाखल केली. मात्र, आम्ही नगरसेवकाची मुले असल्यानं आमच्या विरोधात कोण तक्रार दाखल करू शकतो? असे म्हणत नगरसेवकाची मुले सिद्धार्थचा शोधत घेत होती. मात्र, सापडत नसल्यामुळे त्यांनी त्याचा राग विश्वनाथवर काढला.
